'चोरी गर्न आएको' भन्दै कुटपिट, युवकको ज्यान गयो: दुईविरुद्ध कर्तव्य ज्यान मुद्दा

काठमाडौं । चोरी गर्न आएको भन्दै गरिएको कुटपिटबाट युवकको मृत्यु घटनामा प्रहरीले दुई जनालाई पक्राउ गरेको छ।

ललितपुरको ग्वार्कोमा असार २४ गते राति  एक ग्यारेजमा चोरी गर्न आएको आशंकामा महालक्ष्मी नगरपालिका–४ का अशोक कार्की (अशोक सुबेदी) माथि कुटपिट भएको प्रहरीले जनाएको छ। गम्भीर घाइते भएका सुबेदीलाई तत्काल किष्ट अस्पताल पुर्‍याइएको थियो। उपचारकै क्रममा उनको मृत्यु भएपछि प्रहरीले कर्तव्य ज्यान मुद्दामा अनुसन्धान सुरु गरेको थियो।

घटनापछि फरार रहेका अभियुक्तको खोजी गर्ने क्रममा जिल्ला प्रहरी परिसर ललितपुर, प्रहरी वृत्त सातदोबाटो र प्रहरी प्रभाग इमाडोलको संयुक्त टोलीले उनीहरूलाई विभिन्न स्थानबाट पक्राउ गरेको हो।

पक्राउ पर्नेमा रामेछापको लिखु तामाकोशी गाउँपालिका–६ स्थायी घर भई हाल ग्वार्को बस्दै आएका २६ वर्षीय गणेश मगर र ललितपुरको गोदावरी नगरपालिका–१० चापागाउँ निवासी २६ वर्षीय मनोज दहाल रहेको प्रहरीले जनाएको छ।

प्रहरीले दुवै आरोपितलाई कर्तव्य ज्यान मुद्दामा पाँच दिनको म्याद थप गरी प्रहरी वृत्त सातदोबाटोबाट थप अनुसन्धान अघि बढाएको जनाएको छ।