एसएसपी सुभाषचन्द्र बोहराको नेतृत्वमा लागूऔषध कारोबारविरुद्ध निरन्तर कडा प्रहार

काठमाडौं । लागूऔषध नियन्त्रण ब्यूरोले पछिल्लो समय देशभर लागूऔषध कारोबारविरुद्ध सञ्चालन गरेको अभियानलाई थप तीव्र बनाएको छ। ब्यूरोले निरन्तर अपरेसनमार्फत लागुऔषध तस्करी सञ्जालमाथि कडा प्रहार गर्दै दैनिकजसो उल्लेखनीय परिमाणमा लागूऔषध बरामद गर्नुका साथै संलग्न व्यक्तिहरूलाई पक्राउ गर्न सफल भइरहेको छ।

यसै क्रममा ब्यूरोको टोलीले भक्तपुरको मध्यपुर थिमी नगरपालिका–१, लोकन्थलीबाट ३०० ग्राम खैरो हेरोइनसहित तीन जनालाई पक्राउ गरेको छ। असार २७ गते विशेष सूचनाका आधारमा खटिएको टोलीले लागूऔषध कारोबारमा संलग्न गिरोहको पहिचान गरी कारबाही गरेको हो। घटनाबारे थप अनुसन्धान जारी रहेको ब्यूरोले जनाएको छ।

पक्राउ पर्नेमा काठमाडौं नागार्जुन नगरपालिका–३ का २७ वर्षीय मनिष श्रेष्ठ, सोही स्थानका २९ वर्षीय रोहित महर्जन तथा काठमाडौं महानगरपालिका–१६ का २० वर्षीय सम्भव बस्नेत रहेका छन्। ब्यूरोका अनुसार मनिष श्रेष्ठ यसअघि पनि लागूऔषध मुद्दामा पक्राउ परेका व्यक्ति हुन्। उनले २०८२ जेठ २६ गते ७ महिनाको कैद सजाय भुक्तान गरी एक लाख रुपैयाँ धरौटीमा रिहा भएका थिए।

प्रहरीले उनीहरूको साथबाट ३०० ग्राम खैरो हेरोइन, प्रदेश–३–०२–००८ प ५३७८ नम्बरको स्कुटर र तीन थान मोबाइल फोन बरामद गरेको जनाएको छ।

पछिल्लो समय ब्यूरोले विभिन्न जिल्लामा सञ्चालन गरेका अपरेसनमा खैरो हेरोइन, गाँजा, चरेस, कोकिन, ट्रामाडोललगायत विभिन्न प्रकारका लागूऔषध बरामद हुनुका साथै संगठित तस्करी सञ्जालमा संलग्न व्यक्तिहरूमाथि कारबाहीलाई तीव्रता दिएको छ।

लागूऔषध नियन्त्रण ब्यूरो प्रमुख एसएसपी सुभास बोहराको नेतृत्वमा अनुसन्धान, निगरानी तथा अपरेसनलाई थप प्रभावकारी बनाइएपछि लागूऔषध नियन्त्रण अभियानले गति लिएको छ। विभिन्न जिल्लामा फैलिएको तस्करी सञ्जालको पहिचान गरी त्यसलाई भत्काउने अभियानलाई ब्यूरोले प्राथमिकताका साथ अघि बढाइरहेको जनाएको छ।

यस अभियानमा ब्यूरोका प्रवक्ता तथा सूचना अधिकारी प्रहरी उपरीक्षक दुर्गा राज रेग्मीले अनुसन्धान तथा अपरेसनमा खटिएका प्रहरी टोलीको प्रभावकारी परिचालन, समन्वय र निर्देशनमा सक्रिय भूमिका निर्वाह गर्दै आएका छन्। प्रहरी स्रोतका अनुसार योजनाबद्ध परिचालन तथा सूचनामा आधारित अपरेसनका कारण पछिल्ला दिनमा लागूऔषध नियन्त्रणमा उल्लेखनीय सफलता हासिल भइरहेको छ।

ब्यूरोले लागूऔषध नियन्त्रणलाई पक्राउमा मात्र सीमित नराखी तस्करी सञ्जालको पहिचान, आर्थिक स्रोतको अनुसन्धान तथा अन्तरजिल्ला समन्वयलाई समेत प्राथमिकतामा राखेर अभियान सञ्चालन गरिरहेको जनाएको छ। पक्राउ परेका तीनै जनामाथि लागूऔषधसम्बन्धी कसुरमा थप अनुसन्धान तथा कानुनी प्रक्रिया अघि बढाइएको प्रवक्ता एसपी दुर्गा राज रेग्मीले जानकारी दिएका छन्।