लागूऔषध बरामददेखि मानव बेचबिखन नियन्त्रणसम्म:वरिष्ठ सई बुढा‘बेस्ट पुलिस अफ द मन्थ'

काठमाडौं । जिल्ला प्रहरी कार्यालय बर्दियाले प्रहरी वरिष्ठ नायब निरीक्षक (वरिष्ठ सई) जनकबहादुर बुढा बेस्ट पुलिस अफ द मन्थ’ (उत्कृष्ट प्रहरी) भएका छन् । उत्कृष्ट कार्य गरेका वरिष्ठ सई बुढालाई २०८३ साल असार महिनाको ‘बेस्ट पुलिस अफ द मन्थ’  घोषित गरिएको जिल्ला प्रहरी कार्यालय बर्दियाले जानकारी दिएको छ।

जिल्ला प्रहरी कार्यालय बर्दिया मातहतको प्रहरी चौकी महम्मदपुरका इन्चार्जका रूपमा कार्यरत बुढाले विभागीय मूल्य, मान्यता र संगठनको आदेश–निर्देशनको पूर्ण पालना गर्दै व्यावसायिक तथा लगनशील रूपमा जिम्मेवारी निर्वाह गरेको भन्दै उनलाई उत्कृष्ट प्रहरी घोषित गरिएको जिल्ला प्रहरी कार्यालय बर्दियाले जनाएको छ।

बर्दिया प्रहरीका अनुसार बुढा २०८२ साल चैत १५ गतेदेखि प्रहरी चौकी महम्मदपुरको इन्चार्जका रूपमा कार्यरत छन्।

जिल्ला प्रहरी बर्दियाका अनुसार उनले भारतबाट भन्सार छली नेपाल भित्र्याइने विभिन्न मालसामान नियन्त्रण गर्नुका साथै लागूऔषध ब्राउन सुगर बरामद गरी ओसारपसारमा संलग्न व्यक्तिहरूलाई पक्राउ गरेर कानुनी दायरामा ल्याउन उल्लेखनीय भूमिका निर्वाह गरेका छन् ।

यस्तै, मानव बेचबिखन तथा ओसारपसार नियन्त्रणमा पनि प्रभावकारी कार्यसम्पादन गरेको मूल्यांकन गर्दै संगठनात्मक नीति–निर्देशनअनुसार उनलाई असार महिनाको उत्कृष्ट प्रहरी घोषणा गरिएको जिल्ला प्रहरी कार्यालय बर्दियाले जनाएको छ ।