१८ वर्षपछि समातिए कर्तव्य ज्यान मुद्दाका फरार प्रतिवादी रामनाथ

काठमाडौं । कर्तव्य ज्यान मुद्दाका फरार प्रतिवादीलाई प्रहरीले १८ वर्षपछि पक्राउ गर्न सफल भएको छ। प्रहरी प्रधान कार्यालयका अनुसार  ६० वर्षीय रामनाथ रायलाई पक्राउ गरिएको हो।

प्रहरीका अनुसार २०६५ भदौ ३ गते बिहान करिब ९ बजे दाइजोको विषयलाई लिएर सिरहाको बरियारपट्टी गाउँपालिका–५ झिजौलका रामनाथ राय, बौधा रायसहित तीन जनाले बौधा रायकी श्रीमती २५ वर्षीया चन्द्रिका देवी रायमाथि धारिलो हतियार प्रहार गरी गम्भीर घाइते बनाएका थिए।

घाइते चन्द्रिका देवीलाई उपचारका लागि भारतको बिहार राज्यस्थित पटना लगिएको भए पनि त्यहाँ उपचार सम्भव नभएपछि नेपाल फर्काइएको थियो। त्यसपछि बी.पी. कोइराला स्वास्थ्य विज्ञान प्रतिष्ठान, धरानतर्फ थप उपचारका लागि लैजाँदै गर्दा २०६५ भदौ १९ गते राति उनको मृत्यु भएको प्रहरीले जनाएको छ।

घटनापछि फरार रहेका प्रतिवादी रामनाथ रायलाई गोप्य सूचनाका आधारमा साउन १ गते ११ बजे सिरहाको बरियारपट्टी गाउँपालिका–५ झिजौलस्थित आफ्नै घरमा लुकिछिपी बसेको अवस्थामा प्रहरीले पक्राउ गरेको हो।

पक्राउ परेका रायमाथि जिल्ला प्रहरी कार्यालय सिरहाबाट कर्तव्य ज्यान मुद्दामा थप अनुसन्धान तथा कानुनी प्रक्रिया अघि बढाइएको प्रहरीले जनाएको छ।