बीभी नेपाल’को अनलाइन एमएलएम योजनामा नफस्न साइबर ब्यूरोको आग्रह

काठमाडौँ । नेपाल प्रहरीले ‘बीभी नेपाल’ नामबाट सञ्चालन भइरहेको भनिएको अनलाइन मल्टी–लेभल मार्केटिङ (एमएलएम) योजनाप्रति सर्वसाधारणलाई सतर्क रहन आग्रह गरेको छ।

नेपाल प्रहरीको साइबर ब्युरोका अनुसार उक्त प्लेटफर्ममा ‘क्याम्पस भेन्डिङ मेसिन एसेट म्यानेजमेन्ट प्रोडक्ट–११० डेज’ नामक लगानी योजना अघि सारिएको छ। सो योजनामार्फत छोटो अवधिमै अस्वाभाविक रूपमा उच्च प्रतिफल दिने प्रलोभन देखाएर अनलाइन ठगी भइरहेको सम्बन्धमा गुनासा तथा सूचनाहरू प्राप्त भएको ब्युरोले जनाएको छ।

ब्युरोका प्रवक्ता तथा सूचना अधिकारी प्रहरी उपरीक्षक दिलीपकुमार गिरीले ‘बीभी नेपाल’ लगायत उच्च प्रतिफलको दाबी गर्ने अपरिचित एप, वेबसाइट वा अनलाइन योजनामा रकम लगानी नगर्न नागरिकलाई अनुरोध गरेका छन्।

यस्ता योजनासँग सम्बन्धित कुनै सूचना, गतिविधि वा ठगीको अनुभव भएमा ढिला नगरी नजिकको प्रहरी कार्यालय वा साइबर ब्युरोमा जानकारी गराई उजुरी दर्ता गर्न प्रहरीले आग्रह गरेको छ।

साइबर ब्युरोले अनलाइन लगानीका नाममा आकर्षक आम्दानीको आश्वासन दिने योजनाबारे आवश्यक जाँचबुझ नगरी रकम पठाउँदा आर्थिक क्षति हुन सक्ने भएकाले विशेष सावधानी अपनाउनसमेत सुझाव दिएको छ।