१६ दिन कैद र १ करोड ५८ लाख रुपैयाँ जरिवाना ठहर भएका फरार प्रतिवादी पक्राउ

ललितपुर ।  बैंकिङ कसुर तथा चेक अनादर मुद्दामा अदालतबाट कैद र जरिवाना ठहर भई फरार रहेका एक प्रतिवादीलाई प्रहरीले पक्राउ गरेको छ।

सिन्धुपाल्चोकको लिसंखुपाखर गाउँपालिका–६ घर भई हाल ललितपुर महानगरपालिका–१०, बालकुमारी बस्दै आएका ३३ वर्षीय गणेश भण्डारीलाई अपराध अनुसन्धान कार्यालय टेकुबाट खटिएको टोलीले पक्राउ गरेको हो।

भण्डारीविरुद्ध बैंकिङ कसुरका १० वटा तथा चेक अनादरका २ वटा मुद्दामा सम्मानित उच्च अदालत पाटन र काठमाडौं जिल्ला अदालत, बबरमहलबाट विभिन्न मितिमा फैसला भएको थियो। अदालतको फैसलाअनुसार उनलाई १६ दिन कैद र १ करोड ५८ लाख ५४ हजार ६३० रुपैयाँ जरिवाना ठहर भएको अपराध अनुसन्धान कार्यालयले जनाएको छ।

त्यस्तै, उक्त मुद्दामा बिगो रकम २ करोड ६५ लाख ३४ हजार ९५८ रुपैयाँ रहेको प्रहरीले जनाएको छ।

फरार रहेका भण्डारीको खोजतलास गर्ने क्रममा आज बिहान करिब ९ बजे ललितपुर महानगरपालिका–१०, बालकुमारीबाट पक्राउ गरेको हो।

पक्राउपछि उनलाई सोही मितिमा फैसला कार्यान्वयनका लागि भक्तपुर जिल्ला अदालत, भक्तपुरमा उपस्थित गराइएको अपराध अनुसन्धान कार्यालय टेकुले जनाएको छ।