मन्दिरमा बोका चढाउने विषयमा भएको हत्या घटनाका फरार प्रतिवादी ४३ वर्षपछि पक्राउ

काठमाडौं । मन्दिरमा बोका चढाउने विषयमा भएको विवादपछि कुटपिट गरी हत्या गरेको घटनामा अदालतबाट एक वर्ष कैद सजाय पाएका सिरहाका एक वृद्ध ४३ वर्षपछि पक्राउ परेका छन्।

लक्ष्मीपुरपतारी गाउँपालिका–५ का करिब ८० वर्षीय ठकाई यादवलाई इलाका प्रहरी कार्यालय महेशपुरपतारका प्रमुख प्रहरी निरीक्षक विशाल मल्लको नेतृत्वमा खटिएको टोलीले स्थानीय शिव मन्दिरबाट पक्राउ गरेको हो।

सिरहा प्रहरीका अनुसार २०४१ साल वैशाख १ गते राजदेवी मन्दिरमा लागेको मेलामा बोका चढाउने विषयमा विवाद हुँदा रजिन्द्र यादवमाथि कुटपिट भएको थियो। गम्भीर घाइते यादवको उपचारका क्रममा मृत्यु भएपछि १२ जनाविरुद्ध कर्तव्य ज्यान मुद्दा दर्ता भएको थियो। तत्कालीन सगरमाथा अञ्चल अदालतले २०४६ पुस २५ गते मुख्य योजनाकार मौजेलाल यादवलाई २० वर्ष तथा ठकाई यादवसहित अन्यलाई एक वर्षसम्म कैद सजाय सुनाएको थियो।

फैसलापछि फरार रहेका ठकाई लामो समय अन्यत्र बसेर पछि गाउँ फर्किएको र आफ्ना बाबुले गर्दै आएको मन्दिरको पूजारीको जिम्मेवारी सम्हाल्दै आएको प्रहरीले जनाएको छ। पुराना फरार प्रतिवादीको खोजीका क्रममा मुद्दाको अभिलेख र फैसला अध्ययन गर्दा उनी गाउँमै रहेको खुलेपछि प्रहरीले निगरानी बढाएर पक्राउ गरेको हो। घटनाका अन्य अधिकांश प्रतिवादीको मृत्यु भइसकेको प्रहरीको भनाइ छ।

प्रहरी निरीक्षक मल्लको नेतृत्वमा महेशपुरपतार प्रहरीले पछिल्लो समय पुराना तथा फैसला कार्यान्वयन हुन बाँकी गम्भीर अपराधका मुद्दाका फरार अभियुक्तको खोजीलाई तीव्र बनाएको छ। यसअघि पनि साउन १ गते १८ वर्ष पुरानो कर्तव्य ज्यान मुद्दाका फरार अभियुक्त बरियारपट्टि गाउँपालिका–५ का करिब ६० वर्षीय रामनाथ रायलाई आफ्नै घरबाट पक्राउ गरिएको थियो।

प्रहरीले पुराना मुद्दाका अभिलेख अध्ययन गर्दै फरार अभियुक्तको खोजी र फैसला कार्यान्वयन अभियानलाई निरन्तरता दिने जनाएको छ।