बर्दियाबाट ३४९ ग्रामबढी खैरो हेरोइनसहित दिवे पक्राउ, ब्यूरोका असई शाहीको टोलीको चर्चा

बर्दिया । बर्दियाको बढैयाताल गाउँपालिका–२ फुटाहाबाट ३४९ ग्राम ३६० मिलिग्राम खैरो हेरोइनसहित एक जना पक्राउ परेका छन्।

लागूऔषध नियन्त्रण ब्यूरो शाखा कार्यालय नेपालगन्जबाट प्रहरी सहायक निरीक्षक (असई) नवीन कुमार शाहीको कमान्डमा खटिएको टोलीले विशेष सूचनाका आधारमा उनलाई उक्त परिमाणको खैरो हेरोइनसहित पक्राउ गर्न सफल भएको हो।

पक्राउ पर्नेमा बढैयाताल गाउँपालिका–२ फुटाहाका ५२ वर्षीय दिवे सुनार रहेका छन्। ब्यूरोको टोलीले  शुक्रबार  दिउँसो करिब साढे ३ बजे फुटाहा नजिक सुनारलाई फेला पारी कानुनबमोजिम शरीर खानतलासी गरेको थियो।

खानतलासीका क्रममा उनले लगाएको जिन्स पाइन्टको अगाडिको दाहिने खल्तीमा लुकाएर राखेको अवस्थामा खैरो हेरोइन फेला परेको ब्यूरोले जनाएको छ। बरामद पदार्थको शुद्ध तौल ३४९ ग्राम ३६० मिलिग्राम रहेको छ।

शाहीको टोलीले सुनारको साथबाट एउटा मोबाइल फोन र नेपाली नगद ७ हजार रुपैयाँसमेत बरामद गरेको छ। पक्राउ परेका सुनारलाई थप अनुसन्धान तथा कानुनी कारबाहीका लागि इलाका प्रहरी कार्यालय मैनापोखर, बर्दियामा बुझाइएको लागू औषध नियन्त्रण ब्यूरो शाखा कार्यालय नेपालगन्जले जनाएको छ।

विशेष सूचनाका आधारमा प्रभावकारी ढंगले परिचालन हुँदै ठूलो परिमाणमा खैरो हेरोइन बरामद गर्न सफल भएको भन्दै असई शाहीको कमान्डमा खटिएको टोलीको खुलेरै प्रशंसासहितको राम्रो चर्चा गर्न सुरु भएको छ। लागूऔषधको कारोबार नियन्त्रणमा सक्रियता बढाउँदै आएको ब्यूरोको टोलीले गरेको यो कारबाहीलाई महत्वपूर्ण उपलब्धिका रूपमा हेरिएको छ।