जाजरकोटमा औषधी व्यवसायीको हत्या घटनामा पाँच जना पक्राउ

खलंगा । जाजरकोटमा कुटपिटबाट एक औषधी व्यवसायीको हत्या भएको घटनामा प्रहरीले पाँच जनालाई पक्राउ गरेको छ।

हत्या हुनेमा दैलेखको नारायण नगरपालिका घर भई जाजरकोटको भेरी नगरपालिका–११ जगतिपुरमा औषधी पसल सञ्चालन गर्दै आएका ३२ वर्षीय दीपककुमार थापा रहेको प्रहरीले जनाएको  छ।

प्रहरीका अनुसार गत साउन २५ गते राति करिब ९ बजे भेरी नगरपालिका–१० नुवागाउँमा थापामाथि एक समूहले हातमुक्का प्रहार गर्दै कुटपिट गरेको थियो। घटनामा गम्भीर घाइते भएका उनलाई उपचारका लागि रुकुम पश्चिमको चौरजहारीस्थित मिसन अस्पताल पुर्‍याइएको थियो।

मिसन अस्पतालमा प्रारम्भिक उपचारपछि थप उपचारका लागि नेपालगञ्जस्थित केयर सिटी अस्पताल लगिएका थापाको उपचारकै क्रममा साउन २८ गते बिहान १ः२० बजे मृत्यु भएको जिल्ला प्रहरी कार्यालय जाजरकोटले जनाएको छ।

घटनामा संलग्न रहेको आरोपमा प्रहरीले भेरी नगरपालिका–८ का ३३ वर्षीय वीरेन्द्र खत्री, वडा नम्बर ९ का २१ वर्षीय निरज रोकाय, २१ वर्षीय शिशिर योगी गोसाई, २४ वर्षीय लक्ष्मण रोकाय र २८ वर्षीय विनोद गोसाईलाई साउन २९ गते पक्राउ गरेको हो।

पक्राउ परेकामाथि जाजरकोट जिल्ला अदालतबाट कर्तव्य ज्यान मुद्दामा पहिलोपटक १० दिनको म्याद थप गरी अनुसन्धान भइरहेको प्रहरी निरीक्षक तथा सूचना अधिकारी सुधीरकुमार खड्काले जानकारी दिएका छन्।