मलेसिया उड्न लागेका वायु सेवा निगमका दुई महिला कर्मचारी विदेशी मुद्रासहित पक्राउ

काठमाडौँ । त्रिभुवन अन्तर्राष्ट्रिय विमानस्थलबाट विदेशी मुद्रा सहित नेपाल वायुसेवा निगममा कार्यरत दुई महिला कर्मचारी पक्राउ परेका छन्।

त्रिभुवन अन्तर्राष्ट्रिय विमानस्थल सुरक्षा कार्यालयका अनुसार  साउन ३१ गते राति करिब ९ः३० बजे नेपाल वायुसेवाको उडान नम्बर  आरए ४१५  मार्फत काठमाडौंबाट मलेसियाको क्वालालम्पुर जान लागेका उनीहरूलाई विमानस्थलको अन्तर्राष्ट्रिय उडानतर्फको प्रस्थान ह्यान्ड ब्यागेज चेकिङ क्षेत्रमा शरीर खानतलासी गर्ने क्रममा विदेशी मुद्रासहित पक्राउ गरिएको हो।

पक्राउ पर्नेमा काठमाडौं महानगरपालिका–२६, गंगबु बस्ने ५४ वर्षीया जननी बज्राचार्य र गोरखा नगरपालिका–३, गोरखा बस्ने ३५ वर्षीया ममता पाण्डे रहेको प्रहरीले जनाएको छ।

खानतलासीका क्रममा जननी बज्राचार्यको साथबाट ४ हजार ३ सय अमेरिकी डलर र १२ हजार ३ सय ७२ मलेसियन रिङ्गिट बरामद भएको छ भने ममता पाण्डेको साथबाट ४ हजार २ सय अमेरिकी डलर  र १२ हजार ३ सय २८ मलेसियन रिङ्गिट बरामद भएको प्रहरीले जनाएको छ।

बरामद विदेशी मुद्रा र पक्राउ परेका दुवै जनालाई आवश्यक अनुसन्धान तथा कानुनी कारबाहीका लागि सम्पत्ति शुद्धीकरण अनुसन्धान विभाग, पुल्चोक, ललितपुर पठाइएको त्रिभुवन अन्तर्राष्ट्रिय विमानस्थल सुरक्षा कार्यालयले जनाएको छ।