प्रहरीलाई देखेर भाग्न खोजेपछि हवाई फयर, अनि बरामद भयो १४ किलो बढी अफिम

नेपालगन्ज । बाँकेबाट प्रहरीले १४ किलो बढी  लागूऔषध अफिमसहित दुई जनालाई पक्राउ गरेको छ। पक्राउ पर्नेमा रुकुम पूर्वको सिस्ने गाउँपालिका–१ का ४३ वर्षीय कर्णबहादुर बुढा र रुकुम पश्चिमको मुसिकोट नगरपालिका–८ का ६० वर्षीय टोप जङ भन्ने टाइप सिंह गिरी रहेको जिल्ला प्रहरी कार्यालय बाँकेले जानकारी दिएको  छ।

जिल्ला प्रहरी कार्यालय बाँकेका अनुसार मंगलबार कोहलपुर नगरपालिका–११ चौतारानजिक लागूऔषध अफिमको कारोबार भइरहेको गोप्य सूचनाका आधारमा इलाका प्रहरी कार्यालय कोहलपुर र लागूऔषध नियन्त्रण ब्युरो शाखा कार्यालय नेपालगन्जबाट खटिएको टोलीले सुरुमा शंकास्पद रूपमा हिँडिरहेका बुढालाई नियन्त्रणमा लिएको थियो।

खानतलासी गर्दा बुढाको साथबाट अफिम ९९० ग्राम बरामद भएको बाँके  प्रहरीले जनाएको छ। बुढामाथि थप अनुसन्धान गर्ने क्रममा कोहलपुर नगरपालिका–६ मा डेरा गरी बस्ने गिरीको संलग्नता खुलेपछि प्रहरीले उनलाई प्रहरीको टोलीले नियन्त्रणमा लिन खोजेको थियो।

प्रहरीलाई देखेर गिरी भाग्न खोजेपछि प्रहरीले एक राउण्ड हवाई फायर गरी उनलाई नियन्त्रणमा लिएको थियो। त्यसपछि गिरीको कोठामा खानतलासी गर्दा फ्रिजभित्र लुकाएर राखेको अवस्थामा १३ किलो ६४ ग्राम अफिम बरामद भएको जिल्ला प्रहरी कार्यालय बाँकेले जनाएको छ।

प्रहरीका अनुसार दुवै जनाको साथबाट गरी जम्मा १४ किलो ५४ ग्राम अफिम बरामद भएको छ। त्यस्तै, १४८ ग्राम चरेश डिजिटल तराजु एक थान र नगद ५ हजार रुपैयाँसमेत बरामद गरिएको छ।

पक्राउ परेका दुवै जनामाथि लागूऔषधसम्बन्धी कसुरमा थप अनुसन्धान भइरहेको जिल्ला प्रहरी कार्यालय बाँकेले जनाएको छ।