भोटेकोशी बाढी: सेनाका पाँच हेलिकोप्टरबाट उद्धार जारी, २ हजारबढी फौज परिचालन

काठमाडौँ । रसुवाको भोटेकोशी नदीमा आएको भीषण बाढीबाट प्रभावित नागरिकको उद्धार तथा राहतका लागि नेपाली सेनाले हवाई र स्थलमार्गबाट अभियान तीव्र बनाएको छ। उद्धारका लागि सेनाका पाँचवटा हेलिकोप्टर परिचालन गरिएको छ।

नेपाली सेनाका अनुसार बिहीबार बिहान मात्रै प्रभावित क्षेत्रबाट ९७ जनाको उद्धार गरिएको छ। मैलुङस्थित टनेलबाट तीन जना र टिमुरेबाट १४ जनालाई हेलिकोप्टरमार्फत सुरक्षित स्थानमा ल्याइएको थियो। हेलिकोप्टरबाहेक स्थलमार्गबाट थप ६३ जनाको समेत उद्धार गरिएको सेनाले जनाएको छ।

बाढीबाट प्रभावित क्षेत्रको खोज तथा उद्धार र राहत वितरणका लागि नुवाकोटदेखि चितवनसम्म २ हजारभन्दा बढी सैनिक जनशक्ति परिचालन गरिएको छ। उनीहरूले प्रभावित क्षेत्रमा खोजी, उद्धारसँगै आवश्यक राहत सामग्री वितरणको काम गरिरहेका छन्।

सेनाका ११ वटा टोलीले बुधबार   रातिसमेत स्थलमार्गबाट उद्धार अभियान सञ्चालन गरेका थिए। प्रभावित क्षेत्रमा आवश्यक सामग्री पुर्‍याउन ११ वटा ट्रक परिचालन गरिएको छ। सेनाका अनुसार राहत सामग्री बोकेका चार सटल टिमुरेसम्म पुगिसकेका छन्।

बाढीबाट घाइते भएकाहरूको उपचारका लागि त्रिशूली क्षेत्रमा नेपाली सेनाको मेडिकल टोलीसमेत परिचालन गरिएको छ। घाइतेको उपचारलाई थप प्रभावकारी बनाउन मेडिकल जनशक्ति बढाइएको सेनाले जनाएको छ। बाढीबाट प्रभावित क्षेत्रमा उद्धारसँगै राहत वितरण र घाइतेको उपचारलाई प्राथमिकतामा राखेर सेना निरन्तर परिचालन भइरहेको छ।