पिकअप भ्यानसहित पौने २ क्विन्टल बढी गाँजा बरामद

सिन्धुली। जिल्ला प्रहरी कार्यालय सिन्धुलीले पिकअप भ्यान सहितको १ क्विन्टल ८९ किलो गाँजा र चालकलाई पक्राउ गरेको छ।

सिन्धुली प्रहरीका अनुसार १ क्विन्टल ८९ किलो गाँजासहित पक्राउ पर्नेमा चितवनस्थित गितानगरका शेरबहादुर लामा रहेका छन।

चितवनबाट हेटौंडा-सिन्धुली हुँदै बर्दिबास जाँदै गरेको बा.प्र.प. ०३-००१ च २२८० नम्बरको पिकभ्यानलाई सिन्धुलीको कमलामाई नगरपालिका-१ मा रहेको चेकपोष्टले गएराति जाँच गर्ने क्रममा गाडीको पछाडि लुकाएर लैजाँदै गरेको अवस्थामा गाँजासहित चालक शेरबहादुरलाई पक्राउ गरेको जिल्ला प्रहरी कार्यालय सिन्धुलीले जानकारी दिएको छ।

सिन्धुली प्रहरीले पक्राउ गरेका चालक शेरबहादुरलाई हिरासतमा लिएर थप अनुसन्धान सुरु गरेको जनाएको छ।