कोरिया पठाइदिने भन्दै ३ लाख ठगी गर्ने खडानन्द अपराध अनुसन्धानको नियन्त्रणमा

काठमाडौं । वैदेशिक रोजगारीमा आकर्षक तलबको प्रलोभन देखाउँदै कोरिया पठाइदिने भन्दै रकम ठगी गरेको अभियोगमा प्रहरीले एक जनालाई पक्राउ गरेको छ।

पक्राउ पर्नेमा काठमाडौंको टोखा नगरपालिका–३ बसोबास गर्दै आएका गोरखा भिमसेननाथ गाउँपालिका–२ घर भएका ४३ वर्षीय खडानन्द लामिछाने रहेका छन्। लामिछानेले कोरिया पठाइदिन्छु भन्दै एक जना पीडितबाट ३ लाख रुपैयाँ लिई सम्पर्कविहीन भएको उजुरीका आधारमा उनलाई पक्राउ गरिएको हो।

पीडितको उजुरीपछि काठमाडौं उपत्यका अपराध अनुसन्धान कार्यालय टेकुबाट खटिएको प्रहरी टोलीले काठमाडौं महानगरपालिका–९ बाट लामिछानेलाई पक्राउ गरेको जनाएको छ।

पक्राउ परेका लामिछानेलाई आवश्यक अनुसन्धान तथा कारबाहीका लागि वैदेशिक रोजगार विभाग, ताहाचल काठमाडौं पठाइएको प्रहरीले जानकारी दिएको छ।