फेसबुकमा भरुवा बन्दुकको फोटो पोस्ट गर्ने र बन्दुक धनीसहित २ जना पक्राउ

गोरखा । सिरानचोक गाउँपालिका–६ नयाँसाँघुबाट भरुवा बन्दुकसम्बन्धी घटनामा प्रहरीले दुई जनालाई पक्राउ गरेको छ।प्रहरीले फेसबुकमा भरुवा बन्दुक बोकेको फोटो पोस्ट गर्ने एक जना र लाइसेन्सबिनाको भरुवा बन्दुक राख्ने अर्का एक जनालाई पक्राउ गरेको हो।

पक्राउ पर्नेमा भीमसेन थापा गाउँपालिका–२ सुनार गाउँ घर भई हाल पालुङटार नगरपालिका–१ खोप्लाङमा ज्यामी काम गर्दै आएका ४३ वर्षीय प्रेम सुनार र सोही ठाउँ बस्ने ३३ वर्षीय विष्णु सुनार रहेका छन्।

प्रहरीका अनुसार प्रेम सुनारले आफ्नो फेसबुक आईडी मार्फत भरुवा बन्दुक बोकेको फोटो पोस्ट गरेपछि उनलाई पक्राउ गरिएको हो। उनलाई नियन्त्रणमा लिई अनुसन्धान गर्ने क्रममा लाइसेन्स नभएको एक थान भरुवा बन्दुकसमेत बरामद भएको थियो।

अनुसन्धानका क्रममा उक्त भरुवा बन्दुक पालुङटार नगरपालिका–१ खोप्लाङ बस्ने ३३ वर्षीय विष्णु  सुनारको भएको खुलेपछि प्रहरीले उनलाई समेत नियन्त्रणमा लिएको हो।घटनाबारे थप अनुसन्धान भइरहेको प्रहरीले जनाएको छ।