५३ लाख बराबरको भन्सार छलीका सामान प्रहरीको नियन्त्रणमा

काठमाडौँ । प्रहरीले करिब मोबाइलसहित ५३ लाख रुपैयाँ मूल्य बराबरको भन्सार छलीका सामान बरामद गरेको छ।

चन्द्रागिरि नगरपालिका–२ स्थित नागढुंगा क्षेत्रमा बिहीबार गरिएको चेकजाँचका क्रममा दिल्लीबाट काठमाडौँ आउँदै गरेको बागमती प्रदेश–०३–००१ ख ३५३६ नम्बरको बसबाट विभिन्न विद्युतीय सामग्री तथा कपडा बरामद गरिएको जिल्ला प्रहरी परिसर काठमाडौँले जनाएको छ।

प्रहरीका अनुसार बसको पछाडितर्फको प्यासेजमा लुकाएर राखिएको अवस्थामा २१ थान आइफोनसहित बिल–बिजक नभएका मोबाइल, ल्यापटप, टेम्पर ग्लास, कपडा र जुत्ता फेला परेको हो।

बरामद सामानमा सामसुङका ४९ थान, भिभोका ७५ थान, मोटोरोला १९ थान र रेडमीका ३९ थान मोबाइलसमेत रहेका छन्।

प्रहरी प्रभाग नागढुंगाबाट खटिएको टोलीले चेकजाँचका क्रममा सामान फेला पारेपछि बस चालकलाई नियन्त्रणमा लिएको थियो। पक्राउ पर्नेमा उदयपुरको कटारी नगरपालिका–११ का ३४ वर्षीय पविन्दर राना मगर रहेका छन्।

जिल्ला प्रहरी परिसर काठमाडौँका एसपी दानबहादुर थापाका अनुसार नियन्त्रणमा लिइएका चालक र बरामद सामानलाई आवश्यक अनुसन्धान तथा कारबाहीका लागि त्रिभुवन अन्तर्राष्ट्रिय विमानस्थल भन्सार कार्यालय पठाइएको छ।