पेटभित्र लुकाएर ल्याएको सुनसहित बंगलादेशी नागरिक त्रिभुवन विमानस्थलबाट पक्राउ

काठमाडौं । पेटभित्र लुकाएर सुनका क्याप्सुल ल्याएको आरोपमा त्रिभुवन अन्तर्राष्ट्रिय विमानस्थलबाट एक बंगलादेशी नागरिक पक्राउ परेका छन्।

पक्राउ पर्नेमा बंगलादेशी नागरिक ३५ वर्षीय मोहम्मद रसले हल्दर रहेका छन्। उनी फ्लाई दुबईको एफजेड ११३३ उडानमार्फत दुबईबाट काठमाडौं आएको त्रिभुवन अन्तर्राष्ट्रिय विमानस्थल सुरक्षा कार्यालयले जनाएको छ।

साउन ३१ गते बिहान १०ः३० बजे दुबईबाट काठमाडौं आगमन भएका रस अन्तर्राष्ट्रिय आगमनतर्फको भन्सार एरिया कम गरी पार्किङ एरियातर्फ जाँदै गर्दा सादा पोशाकमा खटिएका प्रहरी कर्मचारीले शंका लागी नियन्त्रणमा लिएका थिए।

सोधपुछका क्रममा उनले करिब १५० ग्राम सुन लुकाएर ल्याएको स्वीकार गरेपछि उनलाई काठमाडौं मेडिकल कलेज, सिनामंगलमा लगिएको थियो। अस्पतालमा पेल्भिक एरियाको एक्स–रे गर्दा शंकास्पद धातु पेटभित्र देखिएपछि तत्काल शौच गराइएको थियो।

तर शौच गराउँदा उक्त वस्तु ननिस्किएपछि धातु पेटमै अड्काएर राखिएको आशंका गरिएको थियो। त्यसपछि आवश्यक कानुनी प्रक्रिया पूरा गरी उनलाई पाँच दिनसम्म अस्पतालमा भर्ना गरेर निगरानीमा राखिएको थियो।

अस्पतालमा राखेर निगरानी गर्ने क्रममा आज शौच गराउँदा पेटबाट सुनको पहेंलो क्याप्सुल आकारका दुई थान धातु निस्किएको विमानस्थल सुरक्षा कार्यालयले जनाएको छ। बरामद धातुको अनुमानित तौल १५० ग्राम रहेको छ।

पेटभित्र लुकाएर ल्याइएको उक्त धातु सुन भए–नभएको सम्बन्धमा थप परीक्षण तथा अनुसन्धान भइरहेको छ। पक्राउ परेका मोहम्मद रसले हल्दारलाई आवश्यक अनुसन्धान तथा प्रचलित कानुनबमोजिम कारबाहीका लागि त्रिभुवन अन्तर्राष्ट्रिय विमानस्थल भन्सार कार्यालय, गौचरमा बुझाइएको प्रहरीले जनाएको छ।