१३ वर्षीया बालिकालाई होटलमा पुर्‍याएर यौन धन्दामा लगाएको आरोपमा दुई पक्राउ

काठमाडौं । १३ वर्षीया बालिकालाई प्रलोभनमा पारी होटलमा पुर्‍याएर यौन धन्दामा लगाएको आरोपमा प्रहरीले झापाबाट दुई जनालाई पक्राउ गरेको छ।

पक्राउ पर्नेमा मोरङको केराबारी गाउँपालिका–९ देवीझोडा घर भई दमक क्षेत्रमा बस्दै आएकी जुनु भनिने पार्वती ऋषिका र झापाको दमक नगरपालिका–८ का ५५ वर्षीय गणेशप्रसाद अधिकारी रहेको प्रहरीले जनाएको छ।

प्रहरीका अनुसार बालिका गत साउन ३१ गते घरबाट आफूखुसी निस्किएपछि परिवारको सम्पर्कमा आएकी थिइनन्। आफन्तले उनको खोजी गरिदिन माग गर्दै इलाका प्रहरी कार्यालय दमकमा निवेदन दिएपछि प्रहरीले खोजतलास थालेको थियो।

खोजीका क्रममा प्रहरीले भदौ ४ गते बालिकालाई फेला पारेको थियो। त्यसपछि घटनाबारे अनुसन्धान अघि बढाउँदा पार्वती ऋषिकाले बालिकालाई ललाइफकाइ गणेशप्रसाद अधिकारीले सञ्चालन गर्दै आएको मनकामना होटल एन्ड लजमा पुर्‍याएको खुलेको प्रहरीले जनाएको छ।

अनुसन्धानका क्रममा उक्त होटलमा बालिकालाई यौन धन्दामा लगाइएको तथ्य खुलेपछि प्रहरीले पार्वती र गणेशप्रसाद दुवैलाई पक्राउ गरेको हो। पक्राउ परेका दुवै जनालाई प्रहरीले भदौ ७ गते झापा जिल्ला अदालतमा पेस गरेको थियो। अदालतबाट मानव बेचबिखन तथा ओसारपसारसम्बन्धी कसुरमा म्याद थपको अनुमति लिएर उनीहरूमाथि थप अनुसन्धान भइरहेको प्रहरीले जनाएको छ।