नयाँ बानेश्वरमा महिला प्रहरीमाथि हातपात, २७ वर्षीय युवक पक्राउ

काठमाडौं ।काठमाडौंको नयाँ बानेश्वर क्षेत्रमा ड्युटीमा खटिएकी महिला प्रहरी जवानमाथि हातपात गरेको आरोपमा प्रहरीले एक युवकलाई पक्राउ गरेको छ।

मंगलबार बिहान सडकमा जथाभावी बाटो काट्न खोजिरहेका युवकलाई महिला प्रहरी जवानले आकाशे पुल प्रयोग गर्न आग्रह गरेकी थिइन्। सोही विषयलाई लिएर विवाद बढेपछि ती युवकले प्रहरी जवानमाथि हातपात गरेको प्रहरीले जनाएको छ।

घटनालगत्तै प्रहरीले युवकलाई नियन्त्रणमा लिएको हो। पक्राउ पर्नेमा जुम्लाको तातोपानी गाउँपालिका–२ घर भई हाल काठमाडौं महानगरपालिका–१०, बानेश्वरमा बस्दै आएका २७ वर्षीय राज कठायत रहेका छन्।

जिल्ला प्रहरी परिसर काठमाडौंका एसपी दानबहादुर थापाका अनुसार घटनाबारे थप अनुसन्धान भइरहेको छ।