लागूऔषध नियन्त्रण ब्यूरोका असई नवीन शाही बने देशभरकै 'उत्कृष्ट प्रहरी'

काठमाडौं । लागूऔषध नियन्त्रण ब्यूरो, कोटेश्वरले प्रहरी सहायक निरीक्षक (असई) नवीन  कुमार शाही २०८३ साउन महिनाको  लागू औषध नियन्त्रण ब्यूरोतर्फ देशभरकै उत्कृष्ट प्रहरी बन्न सफल भएका छन् ।

लागूऔषध नियन्त्रण ब्यूरो शाखा कार्यालय नेपालगञ्ज, बाँकेमा कार्यरत शाहीले साउन महिनामा लागूऔषध खैरो हेरोइनसहित पाँच जना प्रतिवादीलाई पक्राउ गर्न सफल भएको मूल्यांकनका आधारमा उनलाई देशकै उत्कृष्ट प्रहरीघोषित  गरिएको लागू औषध नियन्त्रण ब्यूरो कोटेश्वरले जनाएको छ।

ब्यूरोका अनुसार शाहीको सक्रियतामा उक्त अवधिमा ९१४.४४०  ग्राम खैरो हेरोइन बरामद भएको थियो । जिम्मेवारी निर्वाहमा व्यावसायिकता, लगनशीलता तथा विभागीय मूल्य–मान्यता र आदेश–निर्देशनको पालना गर्दै उत्कृष्ट कार्यसम्पादन गरेको भन्दै उनलाई उत्कृष्ट प्रहरीले सम्मान गरिएको हो ।

शाही यसअघि पनि उत्कृष्ट प्रहरीका रूपमा छनोट भइसकेका छन् । उनी २०८२ साल साउन महिनामा देशभरकै उत्कृष्ट प्रहरी बन्न सफल भएका थिए । बाँकेमा लागूऔषध नियन्त्रणको जिम्मेवारी सम्हालेयता उनको कमान्डमा कयौँ किलो अफिम, चरेस, ठूलो परिमाणमा ब्राउन सुगरलगायतका लागूऔषध तथा प्रतिबन्धित औषधि बरामद भइसकेका छन् ।

शाहीको कमान्डमा रहेको टोलीले लागूऔषध ओसारपसार तथा कारोबार नियन्त्रणका लागि निरन्तर सक्रियताका साथ काम गर्दै आएको देखिन्छ । विशेषगरी खुला सीमाको फाइदा उठाउँदै हुने लागूऔषध कारोबार नियन्त्रणमा उनको नेतृत्वमा प्रहरीले विभिन्न समयमा उल्लेख्य सफलता हासिल गरेको छ ।

उत्कृष्ट प्रहरी घोषित शाहीलाई नगद १ हजार ५ सय रुपैयाँसहित प्रशंसापत्र प्रदान गरिएको छ । इलाका प्रहरी कार्यालय रास्कोट, कालिकोट दरबन्दी रहेका असई शाहीलाई लागूऔषध रोकथाम, नियन्त्रण तथा ओसारपसार गर्ने गिरोहमाथि जाइलाग्न प्रहरी प्रधान कार्यालयले नेपालगन्ज शाखाका प्रमुख बनाएर पठाएको थियो।