नेपाली नागरिक समात्न नेपाल छिरेका दुई भारतीय प्रहरी आफैं नेपाल प्रहरीको नियन्त्रणमा

काठमाडौँ । नेपाली सुरक्षाकर्मीलाई जानकारी नदिई नेपाल प्रवेश गरेर एक नेपाली नागरिकलाई पक्राउ गर्न खोजेको आरोपमा नेपाल प्रहरीले  दुई भारतीय प्रहरीलाई नियन्त्रणमा लिएको छ। भारतको कर्नाटकबाट आएका भारतीय प्रहरीका असईसहित दुई जनालाई शनिबार दिउँसो कञ्चनपुरस्थित इलाका प्रहरी कार्यालय दोधारा चाँदनीले नियन्त्रणमा लिएको कञ्चनपुर प्रहरीले जानकारी दिएको छ।

प्रहरीका अनुसार भारतीय प्रहरीको टोली दोधारा चाँदनीका शंकर लुहारलाई पक्राउ गर्ने उद्देश्यले उनको घरमै पुगेको थियो। अनुमति तथा पूर्वसमन्वयबिना भारतीय प्रहरी नेपाली भूमिमा प्रवेश गरी नेपाली नागरिकलाई पक्राउ गर्न खोजेको सूचना पाएपछि उनीहरूलाई नियन्त्रणमा लिएको प्रहरीले जनाएको छ ।

जिल्ला प्रहरी कार्यालय कञ्चनपुरले दुवै जनालाई इलाका प्रहरी कार्यालय दोधारा चाँदनीले  नियन्त्रणमा लिएको घटनाका बारेमा सम्बन्धित माथिल्लो निकायलाई जानकारी गराइसकिएको र त्यहाँबाट प्राप्त हुने निर्देशनका आधारमा अबको प्रक्रिया अघि बढाइने रावतले बताए।

प्रहरी स्रोतका अनुसार नेपाल प्रहरीसँग कुनै समन्वय वा पूर्वजानकारी नगरी नेपाल प्रवेश गर्ने भारतीय प्रहरीमा कर्नाटक प्रहरीका असई सतिश एमआर र जवान अल्फाब आरएस रहेका छन्।