चीनबाट ५० टन राहतसँगै उद्धारमा सघाउन नेपाल आइपुगे ४ सुरुङ उद्धार विशेषज्ञ

काठमाडौँ । भोटेकोशीसहित विभिन्न क्षेत्रमा आएको बाढीपहिरोबाट प्रभावित नेपाललाई चीन सरकारले ५० टन आपत्कालीन राहत सामग्री उपलब्ध गराएको छ। राहत सामग्री लिएर चिनियाँ जनमुक्ति सेनाको वायुसेनाका दुई ठूला वाई–२० विमान आइतबार बिहान त्रिभुवन अन्तर्राष्ट्रिय विमानस्थलमा अवतरण गरेका हुन्।

बिहान करिब ७ बजे काठमाडौँ आइपुगेका विमानमा राहत सामग्रीसँगै चार जना चिनियाँ सुरुङ उद्धार विशेषज्ञ पनि नेपाल आएका छन्। उनीहरू उद्धारका लागि आवश्यक उपकरणसहित नेपाल आएको चिनियाँ दूतावासले जनाएको छ।

बाढी तथा पहिरोका कारण सुरुङ तथा जलविद्युत् आयोजनासहितका क्षेत्रमा उद्धार कार्य चुनौतीपूर्ण भइरहेका बेला चिनियाँ विशेषज्ञ टोलीको आगमन भएको हो। उनीहरूले आवश्यकताअनुसार उद्धार कार्यमा प्राविधिक सहयोग गर्ने बताइएको छ।

त्रिभुवन अन्तर्राष्ट्रिय विमानस्थलमा आयोजित कार्यक्रममा चिनियाँ पक्षले नेपाललाई पठाएको आपत्कालीन राहत सामग्री हस्तान्तरण गरेको छ। कार्यक्रममा विज्ञान, प्रविधि तथा नवप्रवर्तन मन्त्री महावीर पुन, नेपालका लागि चिनियाँ राजदूत चाङ माओमिङ तथा प्रतिनिधिसभा सदस्य धर्म केसी सहभागी थिए।

सोही अवसरमा नेपाल आइपुगेका चारै जना चिनियाँ सुरुङ उद्धार विशेषज्ञलाई स्वागत गरिएको थियो।

बाढीपहिरोबाट प्रभावित क्षेत्रमा उद्धार तथा राहत अभियान जारी रहेका बेला चीनबाट आएको यो सहयोगले प्रभावित क्षेत्रमा आवश्यक सामग्री आपूर्ति तथा विशेषगरी सुरुङ उद्धार कार्यमा थप प्राविधिक सहयोग पुग्ने अपेक्षा गरिएको छ।