बाँके, बर्दिया र दाङमा ब्राउन सुगरसहित तीन जना पक्राउ

काठमाडौं । बाँके, बर्दिया र दाङबाट प्रहरीले ब्राउन सुगरसहित तीन जनालाई पक्राउ गरेको छ।

बाँकेको नेपालगञ्ज उपमहानगरपालिका–१० ट्राफिक चोकबाट ३ ग्राम १७ मिलिग्राम ब्राउन सुगरसहित भारत उत्तर प्रदेश घर भएका २४ वर्षीय अकिल शाह पक्राउ परेका छन्। उनलाई लागूऔषध नियन्त्रण ब्यूरो शाखा कार्यालय नेपालगञ्जबाट खटिएको प्रहरीले पक्राउ गरेको प्रहरी प्रधान कार्यालयले जानकारी दिएको छ।

यस्तै, बर्दियाको गुलरिया नगरपालिका–११ गणेशपुरबाट ७२० मिलिग्राम ब्राउन सुगरसहित गेरुवा गाउँपालिका–२ बस्ने २५ वर्षीय विनोद सुनार पक्राउ परेका छन्। उनलाई प्रहरी चौकी महम्मदपुरबाट खटिएको टोलीले पक्राउ गरेको हो।

प्रधान कार्यालयका अनुसार दाङको लमही नगरपालिका–६ देउपुरबाट ७२० मिलिग्राम ब्राउन सुगरसहित लमही–७ कमानपुर बस्ने २५ वर्षीय परिवर्तन बुढामगर पक्राउ परेका छन्। उनलाई वडा प्रहरी कार्यालय लमहीबाट खटिएको प्रहरीले पक्राउ गरेको हो।

तीनै घटनाबारे सम्बन्धित प्रहरी कार्यालयले थप अनुसन्धान गरिरहेको प्रहरी प्रधान कार्यालयले जनाएको छ।