भोटेकोशी बाढीमा मृत्यु भएका प्रहरीका परिवारलाई तत्काल १० लाख रुपैयाँ दिने मुख्यालयको निर्णय

काठमाडौं । रसुवाको भोटेकोशी- त्रिशूली बाढीमा परी दिवंगत भएका प्रहरी कर्मचारीका परिवारजनलाई विशेष आर्थिक सहयोगस्वरूप प्रहरी कर्मचारीबाट राहतका लागि संकलन गरिएको रकमबाट तत्काल प्रतिव्यक्ति १० लाख रुपैयाँ उपलब्ध गराउने निर्णय गरिएको  प्रहरी प्रधान कार्यालयले जानकारी दिएमो छ।

प्रहरी महानिरीक्षक दानबहादुर कार्कीको अध्यक्षतामा बुधबार नेपाल प्रहरी प्रधान कार्यालयमा बसेको नीति निर्माण समितिको बैठकले उक्त निर्णय गरेको हो। बैठकले प्रधानमन्त्री दैवी प्रकोप उद्धार कोषमा ४० करोड रुपैयाँ प्रदान गर्ने निर्णयसमेत गरेको हो।

बैठकले रसुवाको भोटेकोशीरत्रिशूली बाढीमा परी दिवंगत भएका प्रहरी कर्मचारीप्रति श्रद्धाञ्जली व्यक्त गर्दै घाइते प्रहरी कर्मचारीहरूको शीघ्र स्वास्थ्यलाभको कामना गरेको छ। साथै, मृतक प्रहरी कर्मचारीका परिवारजनप्रति हार्दिक समवेदना व्यक्त गर्ने निर्णय गरिएको बत्ताइएको छ।

बाढीमा परी हालसम्म फेला पर्न नसकेका प्रहरी कर्मचारीहरूको खोजीका लागि परिवारका सदस्यहरूसँग सम्पर्क तथा समन्वय गरी विशेषज्ञसहितको टोली परिचालन गर्ने र सक्रियताका साथ खोजतलासलाई थप प्रभावकारी बनाउने निर्णयसमेत बैठकले गरेको प्रहरी प्रधान कार्यालयले जनाएको छ।

यसैगरी, दिवंगत प्रहरी कर्मचारीहरूले नेपाल प्रहरी कल्याण कोषबाट लिएको विशेष सापटीबापतको ऋण रकम मिनाहा गर्ने निर्णय गरिएको छ। उनीहरूको परिवारबाट इच्छुक एक जनालाई सीपमूलक तालिम प्रदान गर्नुका साथै रोजगारीका लागि आवश्यक पहल गर्ने निर्णय पनि बैठकले गरेको छ।

दिवंगत प्रहरी कर्मचारीका सन्ततिहरूलाई शैक्षिक वृत्तिअन्तर्गत पायक पर्ने प्रहरी आवासीय विद्यालयमा आधारभूत तहसम्म तथा नेपाल प्रहरी आवासीय विद्यालय, साँगा, काभ्रेमा उच्च शिक्षासम्म शैक्षिक शुल्क मिनाहा गरी अध्ययनको व्यवस्था मिलाउने निर्णय गरिएको प्रहरीले जनाएको छ।

त्यस्तै, बाढी प्रभावित क्षेत्रका प्रहरी एकाइहरू—इप्रका टिमुरे, अ.प्र. पोष्ट मैलुङ, प्र.चौ. रसुवागढी, प्र.चौ. स्याफ्रुवेशी र प्र.चौ. बेत्रावतीमा कार्यरत प्रहरी कर्मचारीहरूका व्यक्तिगत सामग्रीमा भएको क्षतिबापत राहतस्वरूप जनही ५० हजार रुपैयाँ उपलब्ध गराउने निर्णय गरिएको छ।

नेपाल प्रहरी प्रधान कार्यालय, मानवस्रोत विकास विभागले एक जना वरिष्ठ प्रहरी अधिकृतलाई सम्पर्क व्यक्ति तोकी दिवंगत, सम्पर्कविहीन तथा घाइते प्रहरी कर्मचारीहरू एवं उनीहरूका आफन्त र परिवारजनलाई खोजतलास, उपचार तथा सेवा–सुविधा प्राप्तिका लागि आवश्यक सहजीकरण गर्ने निर्णयसमेत बैठकले गरेको छ।