बाढी प्रभावित क्षेत्रमा आईजीपी कार्की, खोज-उद्धारमा कुनै कसर बाँकी नराख्न निर्देशन 

काठमाडौं । प्रहरी महानिरीक्षक (आईजीपी) दानबहादुर कार्कीले भोटेकोशी र त्रिशूली नदीमा आएको विनाशकारी बाढीबाट प्रभावित नुवाकोट, रसुवालगायत जिल्लाको शुक्रबार स्थलगत अनुगमन तथा अवलोकन गरेका छन् ।

अनुगमनका क्रममा महानिरीक्षक कार्कीले बाढी प्रभावित क्षेत्रमा नेपाल प्रहरीले गरिरहेको उद्धार तथा खोजी, शव व्यवस्थापन, घटनास्थल मुचुल्का र राहत वितरणलगायतका कामबारे जानकारी लिएका थिए ।

उनले प्रभावित जिल्लाका प्रमुख जिल्ला अधिकारी तथा सुरक्षा निकायका प्रतिनिधिसँग विपद् व्यवस्थापन, उद्धार तथा खोजी कार्य र राहत वितरणलाई थप प्रभावकारी, व्यवस्थित तथा पारदर्शी बनाउने विषयमा छलफलसमेत गरेका थिए ।

विपद्को कठिन अवस्थामा राष्ट्र र नागरिकको सेवामा खटिएका प्रहरी कर्मचारीलाई उच्च मनोबलका साथ जिम्मेवारी निर्वाह गर्न निर्देशन दिँदै उनले आफ्नो ज्ञान, सीप, विवेक र क्षमताको उच्चतम् प्रयोग गरी उद्धार तथा खोजी कार्यमा कुनै कसर बाँकी नराख्न आग्रह गरे ।

बाढी प्रभावित क्षेत्रमा महिला, बालबालिका तथा ज्येष्ठ नागरिकमाथि हुन सक्ने दुर्व्यवहार र हिंसाप्रति थप संवेदनशील भएर काम गर्नुपर्नेमा उनले जोड दिए । विपद्को मौका छोपी हुन सक्ने आपराधिक गतिविधि नियन्त्रणका लागि प्रहरी परिचालनलाई प्रभावकारी बनाउन तथा स्थानीय तहसँग आवश्यक समन्वय गरी राहत वितरणलाई पारदर्शी बनाउन पनि उनले निर्देशन दिए ।

प्रहरी महानिरीक्षक कार्कीसँगै नेपाल प्रहरीका केन्द्रीय प्रहरी प्रवक्ता प्रहरी नायव महानिरीक्षक अबिनारायण काफ्लेलगायत वरिष्ठ प्रहरी अधिकृतहरूले पनि बाढी प्रभावित जिल्लाको स्थलगत अनुगमन तथा अवलोकन गरेका थिए ।