पत्रकार महासंघ केन्द्रले भन्यो- बाँकेका सीडिओको अभिव्यक्तिप्रति गम्भीर ध्यानाकर्षण भएको छ

काठमाडौं । नेपाल पत्रकार महासंघ केन्द्रीय कार्यालयले  बाँकेका प्रमुख जिल्ला अधिकारी (सीडिओ) धर्मराज जोशीले पत्रकारलाई  प्रयोग गरेको अपशब्दलाई लिएर  गम्भीर ध्यानाकर्षण भएको जनाएको छ।

पत्रकार महासंघका केन्द्रीय महासचिव रामप्रसाद दाहालले विज्ञप्ति जारी गर्दै कोहलपुरस्थित मिसन टुडे दैनिकका पत्रकार शुभाकर विश्वकर्मालाई अपशब्द प्रयोग गरी गालीगलौज गरेकोमा महासंघको ध्यानाकर्षण भएको  जनाउँदै खेद प्रकट गरेको छ।

 वैशाख ५ गते शुक्रबार नागरिकता नपाएका एक जना व्यक्तिका बारेमा बुझ्न खोज्दा प्रजिअ जोशीले ‘नागरिकताका लागि फोन गर्नेलाई म दलाल नै सम्झिन्छु’ भन्ने आपत्तिजनक शब्द प्रयोग गरेको महासंघले आपत्ति प्रकट गरेको विज्ञप्तिमा भनिएको छ।

राज्यका जिम्मेवार अधिकारीबाटो पत्रकारलाई समाचारका लागि सघाउनु र सहज वातावरण निर्माण गर्नुको साटो यस प्रकारले प्रस्तुत हुनुलाई महासंघले अत्यन्त निन्दनीय, गैरजिम्मेवार र प्रेस स्वतन्त्रताविरोधी कदमका रुपमा लिएको महासंघका केन्द्रीय महासचिव रामप्रसाद दाहालद्वारा जारी विज्ञप्तिमा जनाइएको छ।

यसबाट पत्रकारलाई पेसाप्रति हतोत्साहित र त्रसित बनाउनुका साथै पत्रकारको संवैधानिक सुनिश्चितता र सामाजिक सद्भावमा समेत आघात पुग्ने महासंघले  ठहर गरेको महासचिव दाहालद्वारा हस्ताक्षरित विज्ञप्त्तिमा जनाएको छ ।

पत्रकार महासंघ प्रेसविरोधी यो घटनाको सत्यतथ्य छानिबन गरी यस्ता हर्कतमा संलग्न जो कोही भए पनि कानुनबमोजिम कारबाही गरी पत्रकारलाई निर्धक्क र सुरक्षित रूपमा काम गर्ने वातावरण बनाउन तथा यस्ता घटना नदोहोरिनेतर्फ विशेष ध्यान दिन सम्बन्धित निकायसँग माग गरेको छ।