भन्सार अधिकृतले सशस्त्र प्रहरीका एसपीलाई धम्की दिएको अडियो प्रकरण संसद्मा प्रवेश
काठमाडौं । कञ्चनपुर भन्सारका एक अधिकृत र कैलालीस्थित सशस्त्र प्रहरीका एसपीबीच भएको फोन संवाद अहिले प्रतिनिधिसभासम्म पुगेको छ ।
गाडी नियन्त्रणमा लिएको विषयलाई लिएर भन्सार अधिकृतले सशस्त्र प्रहरीका एसपी खुम केसीलाई धम्कीपूर्ण भाषा प्रयोग गरेको अडियो सार्वजनिक भएपछि सांसद टीका संग्रौलाले आजको प्रतिनिधिसभाको बैठकमा उक्त विषय उठाएकी हुन् ।
राष्ट्रिय स्वतन्त्र पार्टीकी सांसद संग्रौलाले अडियोमा प्रयोग भएको भाषाप्रति आपत्ति जनाउँदै घटनाको सत्यतथ्य छानबिन हुनुपर्ने बताइन् ।
उनका अनुसार संवादमा भन्सार अधिकृतले आफ्ना विभागीय महानिर्देशक, सशस्त्र प्रहरी महानिरीक्षक तथा गृहमन्त्रीसम्मलाई समेत चुनौती दिने किसिमको अभिव्यक्ति दिएका छन् ।
संग्रौलाले यस्तो अभिव्यक्तिले सरकारी निकायबीचको मर्यादा र चेन अफ कमान्डमाथि प्रश्न उठाएको बताउँदै ‘स्वाट्टै हान्छु’ भन्ने भनाइको वास्तविक आशय स्पष्ट पार्नुपर्ने माग गरिन् ।
उनले भन्सारका एक अधिकृतले गृहमन्त्रीलाई समेत चुनौती दिन सक्ने अवस्था हो भने राज्य संयन्त्रभित्रको अधिकार र जिम्मेवारीबारे गम्भीर प्रश्न उठ्ने बताइन् ।
उक्त अडियो प्रकरणले राज्य संयन्त्रकै छविमा असर पार्ने भन्दै संग्रौलाले सम्बन्धित निकायबाट निष्पक्ष छानबिन गरी वास्तविकता सार्वजनिक गर्न माग गरेकी छन् ।
कारागारमा छन् क्षमताभन्दा बढी कैदीबन्दी
सोमबार, असोज १२, २०८३
राप्ती सोनारीमा चाडपर्व लक्षित सुरक्षा व्यवस्था चुस्त बनाउन रास्वपाको माग
सोमबार, असोज ५, २०८३
१२ क्विन्टल बढी गाँजासहितको ट्रक सुरक्षा फौजको नियन्त्रणमा
बुधबार, भदौ २४, २०८३
जमुनाह नाकाबाट ४ सय ६४ नेपालीको उद्धार
बुधबार, भदौ २४, २०८३
