लुम्बिनीमा १० करोडभन्दा बढीको अवैध सामान बरामद, सीमा अपराध नियन्त्रणमा सशस्त्र प्रहरीको कडाइ

काठमाडौं । लुम्बिनी प्रदेशमा सशस्त्र प्रहरी बल, नेपालले सीमा क्षेत्रमा कडाइ गर्दै अवैध निकासी–पैठारी, लागूऔषध कारोबार तथा मानव बेचबिखनविरुद्धको अभियानलाई तीव्र बनाएको छ । आर्थिक वर्ष २०८३-८४ को पहिलो दुई महिनामै सशस्त्र प्रहरीले १० करोड ४३ लाख रुपैयाँभन्दा बढी मूल्यका अवैध सामान बरामद गरेको हो ।

सशस्त्र प्रहरी बल, नेपाल नं. ५ बिन्ध्यावासिनी बाहिनी मुख्यालय, रुपन्देहीका अनुसार साउन र भदौमा बाहिनीअन्तर्गतका विभिन्न इकाइले १० करोड ४३ लाख २२ हजार ८८२ रुपैयाँ बराबरका अवैध निकासी–पैठारीका सामान बरामद गरेका हुन् ।

बरामद सामान आवश्यक कारबाहीका लागि सम्बन्धित राजस्व तथा भन्सार कार्यालयमा बुझाइएको बाहिनीले जनाएको छ । बरामद हुने सामानमा लत्ताकपडा, मोटरका पार्टपुर्जा, किराना तथा खाद्यान्न, निर्माण सामग्री, विद्युतीय सामग्री, खरबुजाको बीउ, सुर्तीजन्य पदार्थलगायत छन् ।

दुई महिनाको तथ्यांक हेर्दा भदौमा मात्रै ६ करोड ४८ लाख ७२ हजार ५३० रुपैयाँ बराबरको अवैध सामान बरामद भएको छ । साउनमा भने ३ करोड ९४ लाख ५० हजार ३५२ रुपैयाँ बराबरको सामान बरामद गरिएको थियो ।

कुन इकाइले कति बरामद गरे ?

जिल्लागत तथ्यांकअनुसार सबैभन्दा धेरै बरामदगी नं. २६ गण, पश्चिम नवलपरासीबाट भएको छ । उक्त गणले दुई महिनामा ३ करोड ३१ लाख १९ हजार २४ रुपैयाँ बराबरको अवैध सामान बरामद गरेको नं. ५ बिन्ध्यावासिनी बाहिनी मुख्यालयले जनाएको छ ।

बाहिनीका अनुसार त्यसपछि नं. २७ गण मुख्यालय, रुपन्देहीले २ करोड ९८ लाख ८ हजार ८७५ रुपैयाँ, नं. ३० गण मुख्यालय, बागेश्वरी बाँकेले १ करोड ५३ लाख ६२ हजार ६५२ रुपैयाँ र नं. २८ गण मुख्यालय, कपिलवस्तुले १ करोड ४ लाख ८४ हजार ४९९ रुपैयाँ बराबरको सामान बरामद गरेको हो ।

त्यस्तै, नं. ३१ गण मुख्यालय, बर्दियाले १ करोड १२ लाख २९ हजार २७४ रुपैयाँ र नं. २९ गण मुख्यालय, ज्वालामाई दाङले ७ लाख १८ हजार ५५८ रुपैयाँ बराबरको सामान बरामद गरेको नं.५ बिन्ध्यावासिनी बाहिनीले जानकारी दिएको छ ।

लागूऔषध नियन्त्रणमा पनि ठूलो कारबाही

सीमा क्षेत्रमा नियमित तथा आकस्मिक परिचालन बढाएसँगै लागूऔषध नियन्त्रणतर्फ पनि सशस्त्र प्रहरीले कारबाही तीव्र बनाएको छ दुई महिनाको अवधिमा लागूऔषधसम्बन्धी कारबाहीमा २७ जना पक्राउ परेका छन् । उनीहरूलाई आवश्यक कारबाहीका लागि सम्बन्धित निकायमा बुझाइएको बाहिनीले जनाएको छ ।

यस क्रममा १५.०३ ग्राम ब्राउन सुगर, ८ किलो ६१२ ग्राम गाँजा, प्रतिबन्धित औषधि प्रोथाजिन १२३ थान, ट्रामाडोल ४ हजार ३२० पत्ता, डाइजिपाम इन्जेक्सन २६ थान, प्रोमिथाजिन २ गोटा, कोरेक्स ५ बोतल तथा प्रिगावालिन २८० क्याप्सुललगायतका पदार्थ बरामद गरिएको हो ।

मानव बेचबिखनमा संलग्न ८ जना पक्राउ, ९ जनाको उद्धार

मानव बेचबिखन तथा ओसारपसार नियन्त्रण अभियानअन्तर्गत पनि सशस्त्र प्रहरीले कारबाहीलाई तीब्र पारेको छ ।

बाहिनीका अनुसार यस अवधिमा उक्त गतिविधिमा संलग्न ८ जनालाई नियन्त्रणमा लिई आवश्यक कारबाहीका लागि सम्बन्धित निकायमा बुझाइएको छ । जोखिममा परेका ९ जनाको उद्धार गरी सम्बन्धित निकायको संरक्षणमा पठाइएको छ ।

बुधबार साँझ मात्रै बाँकेको नरैनापुरस्थित सुईया नाकाबाट बर्दियाका दुई किशोरीको उद्धार गरिएको बाहिनीले जनाएको छ। उक्त घटनामा दुई जनालाई पक्राउ गरी प्रहरीको जिम्मा लगाइएको सशस्त्र प्रहरी बल, नेपाल नं.५ बिन्ध्यावासिनी बाहिनी मुख्यालयले जनाएको छ ।

सीमामा मात्रै होइन, सीमावासीसँग पनि सशस्त्र प्रहरी

सीमा सुरक्षालाई प्रभावकारी बनाउन सशस्त्र प्रहरीले सुरक्षा कारबाहीसँगै सीमावासीसँगको सम्बन्धलाई पनि प्राथमिकतामा राखेको जनाएको छ ।

‘सीमावासीसँग सशस्त्र प्रहरी कार्यक्रम’ अन्तर्गत सीमावर्ती क्षेत्रमा सीपमूलक तालिम, निःशुल्क स्वास्थ्य शिविर तथा जनचेतनामूलक कार्यक्रम सञ्चालन गरिएको छ । विद्यालय, क्लब तथा सामाजिक संस्थामार्फत लैङ्गिक हिंसा, मानवअधिकार र लागूऔषध दुर्व्यसन न्यूनीकरणसम्बन्धी सचेतनामूलक कार्यक्रमसमेत सञ्चालन गरिएको बाहिनीले जनाएको छ ।

सीमावर्ती नागरिकको जीवनस्तर, चेतनाको स्तर र स्थानीय सहभागिता बढाउन सके सीमा सुरक्षा थप प्रभावकारी हुने निष्कर्षसहित यस्ता कार्यक्रमलाई प्राथमिकता दिइएको बाहिनीको भनाइ छ ।

त्यसैगरी, सशस्त्र प्रहरी बल, नेपाल नं. ५ बिन्ध्यावासिनी बाहिनी मुख्यालयले भारतीय सशस्त्र सीमा बल(एसएसबी) लगायत सरोकारवाला निकायसँग समन्वय र सहकार्य गर्दै सीमा सुरक्षा, सीमापार अपराध, राजस्व चुहावट तथा संगठित अपराध नियन्त्रणमा काम गरिरहेको जनाएको छ ।

दुई महिनाको तथ्यांकले लुम्बिनी प्रदेशमा सशस्त्र प्रहरीको सीमा निगरानी र अवैध गतिविधिविरुद्धको कारबाहीको व्यापकता देखाएको छ । अवैध सामान बरामद, लागूऔषध नियन्त्रण तथा मानव बेचबिखनविरुद्धको कारबाहीसँगै सीमावासीसँगको सहकार्यलाई समेत प्राथमिकता दिइएको छ। विशेषगरी सीमा अपराध नियन्त्रणका लागि सशस्त्र प्रहरीले गरेको निरन्तर परिचालन र कारबाहीले सीमावर्ती क्षेत्रमा सुरक्षा व्यवस्थालाई थप प्रभावकारी बनाउन योगदान पुर्‍याएको स्थानीय बासिन्दाको भनाइ छ ।

लुम्बिनीस्थित सशस्त्र प्रहरी बलको नेतृत्व सम्हाल्दै आएका डीआईजी दीपक अधिकारीको निर्देशनअनुसार प्रदेशभरका सीमामा सशस्त्र प्रहरी अवैध गतिविधि नियन्त्रण र सीमा सुरक्षालाई प्राथमिकतामा राख्दै प्रतिबद्धताका साथ परिचालित भएको देखिन्छ ।