जमुनाह नाकाबाट ४ सय ६४ नेपालीको उद्धार

नेपालगञ्ज । नेपाल–भारत सीमा  क्षेत्र  जमुनाह नाकाबाट ४ सय ६४ जनाको उद्धार गरिएको छ। गत आर्थिक वर्षमा जोखिमपूर्ण यात्रामा रहेका ४ सय ६४ जना नेपाली नागरिकको उद्धार गरिएको हो।

माइती नेपाल नेपालगञ्जका अनुसार गत आ.व. मा आर्थिक प्रलोभन, पारिवारिक समस्या, चेतनाको कमी तथा सामाजिक सञ्जालको दुरुपयोगका कारण जोखिमपूर्ण रूपमा भारततर्फ जान लागेका उनीहरूलाई सीमा नाकाबाट रोकेर उद्धार गरिएको हो।

माइती नेपाल नेपालगञ्जका संयोजक केशव कोइरालाले उद्धार गरिएका व्यक्तिलाई आवश्यक परामर्श दिएपछि परिवारको जिम्मा लगाइएको जानकारी दिए। उनका अनुसार सीमा क्षेत्रमा निगरानी बढाइए पनि विभिन्न प्रलोभनमा पारेर नेपाली नागरिकलाई भारत लैजाने क्रम पूर्ण रूपमा रोकिएको छैन।

यस अवधिमा भारत पुगेर श्रम तथा यौन शोषणमा परेका १० जनालाई समेत उद्धार गरी नेपाल फर्काइएको कोइरालाले बताए। भारतीय प्रहरी, नेपाली दूतावास तथा भारतका स्थानीय गैरसरकारी संस्थासँगको समन्वयमा उनीहरूको उद्धार गरिएको उनले जानकारी दिए।

माइती नेपालमा हराएका आफन्तको खोजी तथा उद्धारका लागि गत आर्थिक वर्षमा १ हजार १८ वटा निवेदन परेको थियो। तीमध्ये ५ सय ६८ जना फेला परेका छन् भने ४ सय ५० जनाको अवस्था अझै अज्ञात रहेको कोइरालाले बताए।

खुला सीमा, आर्थिक विपन्नता र पर्याप्त चेतनाको अभावका कारण मानव बेचबिखनको जोखिम कायमै रहेको उनको भनाइ छ। सीमा नाकामा निगरानीसँगै समुदायस्तरमा सचेतना र सुरक्षित रोजगारीका अवसर बढाउन आवश्यक रहेको उनले बताए।

मानव बेचबिखन तथा ओसारपसारमा संलग्नलाई कानुनी कारबाहीको दायरामा ल्याउन माइती नेपालले कानुनी सहायता पनि दिँदै आएको जनाएको छ। गत आर्थिक वर्षमा मानव बेचबिखन तथा ओसारपसारसँग सम्बन्धित तीनवटा मुद्दामा पीडित तथा प्रभावितलाई संस्थाले प्रत्यक्ष कानुनी सहायता उपलब्ध गराएको थियो।