राप्ती सोनारीमा चाडपर्व लक्षित सुरक्षा व्यवस्था चुस्त बनाउन रास्वपाको माग

बाँके । दसैँ, तिहारलगायतका चाडपर्व नजिकिँदै गर्दा बाँकेको राप्ती  सोनारी गाउँपालिकामा सुरक्षा व्यवस्था चुस्त बनाउन माग गरिएको छ ।

चाडपर्वका बेला हुन सक्ने चोरी, लुटपाट तथा अन्य आपराधिक गतिविधि नियन्त्रणका लागि गाउँपालिका क्षेत्रको सुरक्षा निगरानी बढाउनुपर्ने भन्दै राष्ट्रिय स्वतन्त्र पार्टी(रास्वपा) राप्ती सोनारीले बाँकेका प्रमुख जिल्ला अधिकारी(सीडीओ) दिलकुमार तामाङलाई ध्यानाकर्षण पत्र बुझाएको हो ।

रास्वपाले सुरक्षा संयन्त्रलाई थप चलायमान बनाउन, गाउँ तथा टोलमा प्रहरी गस्ती बढाउन तथा आवश्यकता अनुसार विभिन्न प्रहरी चौकीमा जनशक्ति थप गर्न माग गरेको छ ।

गाउँपालिकास्थित प्रहरी चौकीहरुमा जनशक्ति कम रहेकाले पनि गाउँपालिकाका विभिन्न क्षेत्रमा प्रहरीको पहुँच र निगरानी प्रभावकारी बनाउन चुनौती रहेको भन्दै रास्वपाले आवश्यक जनशक्ति व्यवस्थापन गर्न प्रशासनसँग आग्रह गरेको हो।

रास्वपा राप्ती सोनारीका तर्फबाट सभापति भूपेन्द्र वली र रास्वपाका युवा नेता प्रदिप पौडेलले सीडीओ तामाङलाई ध्यानाकर्षण पत्र बुझाएका हुन् ।

ध्यानाकर्षण पत्र बुझ्दै सीडीओ तामाङले तत्काल जिल्ला प्रहरी प्रमुखलाई यसबारे जानकारी गराई राप्ती सोनारी क्षेत्रमा सुरक्षा व्यवस्था चुस्त बनाउन तथा निगरानी बढाउन लगाउने बताएका छन् ।

रास्वपाले गाउँ तथा टोलमा शंकास्पद गतिविधि देखिएमा नजिकको प्रहरी चौकी, स्थानीय जनप्रतिनिधि वा प्रहरीको आपतकालीन नम्बर १०० मा तत्काल जानकारी गराउन राप्ती सोनारीवासीलाई आग्रह गरेको छ ।