बेगनास तालमा बेपत्ता भएका श्रेष्ठको शवलाई ३५ फिट गहिराइबाट निकाल्यो सशस्त्र प्रहरीले

कास्की  । सशस्त्र प्रहरीले बेगनास तालमा पौडी खेल्ने क्रममा बेपत्ता भएका एकजनाको शव ३५ फिट गहिराइबाट निकालेको छ। 

पोखरा महानगरपालिका-३१ माझीकुना बेगनास तालमा पौडी खेल्ने क्रममा बेपत्ता गोरखाको शहिदलखन गाउँपालिका-३ मनकामनाका ४३ वर्षीय राजेश श्रेष्ठको शव सशस्त्र प्रहरीको गोताखोरले निकालेको हो।

सशस्त्र प्रहरीका अनुसार पोखरा घुम्न आएका श्रेष्ठ जेठ २५ गते साँझ साढे ७  बजे तालमा पौडी खेल्ने क्रममा बेपत्ता भएका ।  बेपत्ता भएको खबर पाएर सशस्त्र प्रहरी बल नेपाल नं २४ कालिका गणबाट सशस्त्र प्रहरी निरीक्षकको नेतृत्वमा खटिएको गोताखोर टोलीले आज बिहान १० बजे श्रेष्ठको शव फेला पारेको सशस्त्र प्रहरी प्रधान कार्यालयले जानकारी दिएको छ।

गोताखोरको टोलीले ३५ फिट गहिराइमा गएर खोजी गर्ने क्रममा श्रेष्ठको शव फेला पारेर निकालेको हो।