प्रहरी र सेनामा जागिर लगाइदिन्छु भन्दै २७ लाख ठगी गरेका 'उर्फ मोहन पक्राउ 

काठमाडौं । प्रहरी र नेपाली सेनामा जागिर लगाइदिन्छु भन्दै २७ लाख ३० हजार रुपैयाँ ठगी गरेर  फरार रहेका एक  प्रतिवादी पक्राउ परेका छन्।

पक्राउ पर्नेमा पूर्वी नवलपरासीको देवचुली नगरपालिका–७ घर भई हाल काठमाडौंको बूढानीलकण्ठ नगरपालिका–८ बस्ने ३८ वर्षीय  राज श्रेष्ठ 'उर्फ मोहन केसी' रहेको प्रहरी प्रधान कार्यालयले जनाएको छ।

प्रहरी प्रधान कार्यालयका अनुसार श्रेष्ठलाई  असोज २ गते बूढानीलकण्ठ नगरपालिका–८ बाट पक्राउ गरिएको हो।

श्रेष्ठविरुद्ध प्रहरी तथा नेपाली सेनामा जागिर लगाइदिन्छु भन्दै विभिन्न व्यक्तिबाट २७ लाख ३० हजार रुपैयाँ ठगी गरेको आरोपमा इलाका प्रहरी कार्यालय भजनी, कैलालीबाट ठगी मुद्दामा पक्राउ पुर्जी जारी भएको थियो।

पक्राउ पुर्जी जारी भएपछि उनी फरार रहेका थिए। फरार प्रतिवादीको खोजी गर्ने क्रममा काठमाडौंमा लुकीछिपी बसिरहेको अवस्थामा श्रेष्ठलाई पक्राउ गरिएको प्रहरी प्रधान कार्यालयले जनाएको छ।

पक्राउ परेका श्रेष्ठमाथि थप अनुसन्धान तथा आवश्यक कानुनी कारबाहीका लागि सम्बन्धित प्रहरी कार्यालयमा पठाउने प्रक्रिया अघि बढाइएको प्रहरी प्रधान कार्यालयले जनाएको छ।