धरौटी बुझाउन नसकेपछि किस्पाङ गाउँपालिका अध्यक्ष तामाङ कारागार चलान

काठमाडौँ। नुवाकोटको किस्पाङ गाउँपालिकाका अध्यक्ष वीरबल तामाङलाई दुईवटा बैंकिङ कसुर मुद्दामा माग गरिएको धरौटी रकम बुझाउन नसकेपछि कारागार पठाइएको छ।

काठमाडौँ जिल्ला अदालतको आदेशअनुसार २२ लाख रुपैयाँ धरौटी दाखिला गर्न नसकेपछि तामाङलाई केन्द्रीय कारागार सुन्धारा चलान गरिएको जिल्ला प्रहरी परिसर काठमाडौँले जनाएको छ।

बिहीबार अदालतले तामाङविरुद्ध दायर बैंकिङ कसुरका दुई मुद्दामा छुट्टाछुट्टै १६ लाख र ६ लाख रुपैयाँ धरौटी माग गरेको थियो। तोकिएको रकम बुझाउन नसकेपछि उनलाई थुनामा राख्न कारागार पठाइएको हो।

तामाङलाई गत भदौ २९ गते सिंहदरबारको दक्षिण गेटबाट प्रहरीले पक्राउ गरेको थियो। प्रधानमन्त्री बालेन्द्र शाहसँग छलफल गरेर बाहिरिने क्रममा उनी पक्राउ परेका थिए।

प्रहरीका अनुसार तामाङविरुद्ध विभिन्न प्रकृतिका १० वटा फौजदारी मुद्दा दर्ता भएका छन्। काठमाडौँको नयाँबजारमा ओशिन ट्रान्सपोर्ट एन्ड एड्भेन्चर प्रालि सञ्चालन गर्दै आएका उनीविरुद्ध अन्य निकायबाट समेत थप अनुसन्धानका लागि पत्राचार भएको छ।

राजस्व न्यायाधीकरण र जिल्ला प्रहरी परिसर भक्तपुरले तामाङलाई थप अनुसन्धानका लागि उपस्थित गराइदिन जिल्ला प्रहरी परिसर काठमाडौँलाई पत्र पठाएका छन्। बैंकिङ कसुरका दुई मुद्दामा धरौटी बुझाउन नसकेर कारागार पुगेका तामाङमाथि अब ती निकायको अनुसन्धान पनि अघि बढ्नेछ।