वीरगञ्जका मेयर राजेशमान सिंहलाई धरौटीमा रिहा गर्न आदेश

पर्सा । वीरगञ्ज महानगरपालिकाका मेयर राजेशमान सिंहलाई जिल्ला अदालत पर्साले धरौटीमा रिहा गर्न आदेश दिएको छ। 

पर्सा अदालतका मुख्य न्यायाधीश गायत्रीप्रसाद रेग्मीको इजलासले लिखतसम्बन्धी  कसुरमा मेयर सिंहलाई ४ लाख १५ हजार रुपैयाँ धरौटीमा रिहा गर्न आदेश दिएको हो भने झुटा विवरण पेश गरी नागरिकता बनाएको आरोपमा १५ हजार रुपैयाँ धरौटी तोकेको हो।

मेयर सिंहविरुद्ध लिखतसम्बन्धी कसुरमा पक्राउ पुर्जी जारी भएपछि उनी अदालतमा हाजिर नभई सम्पर्कविहीन बनेका थिए। त्यसपछि प्रहरीको टोलीले उनलाई पर्साको ठोरीबाट पक्राउ गरेको थियो।

मेयर सिंहमाथि एक किशोरीलाई आफ्नै छोरी भएको झुटो विवरण पेश गरी नेपाली नागरिकता दिलाएको आरोप छ। उक्त नागरिकता २०७५ सालमा जारी भएको थियो। नागरिकता प्रकरण सार्वजनिक भएपछि उनीमाथि विभिन्न निकायमा उजुरी परेका थिए।

यसैबीच, छानबिनका क्रममा सिंहले दोस्रो विवाह गरेको स्वीकार गरेपछि सम्बन्ध विच्छेदसम्बन्धी मुद्दा दर्ता भएको विषयले पनि प्रकरणलाई थप चर्चामा ल्याएको छ। नागरिकता र लिखतसम्बन्धी आरोपबारे अदालतमा मुद्दा विचाराधीन छ।