अवैध रुपले लैजान लागिएको गोरुसहितको ट्रक प्रहरीको नियन्त्रणमा

परासी। प्रहरीले अवैध रुपले लैजाँदै गरिएका दर्जन बढी गोरुसहितको एउटा ट्रक र चालकलाई नियन्त्रणमा लिएको छ।

जिल्ला प्रहरी कार्यालय नवलपरासी पश्चिमका अनुसार आज बिहान चेक जाचका क्रममा पश्चिमबाट पूर्वतर्फ जादै गरेको ना ६ ख ८१७७ नं. को गोरुसहितको ट्रकलाई इलाका प्रहरी कार्यालय बर्दघाटले नियन्त्रणमा लिएको हो।

बर्दघाट नगरपालिका-४ टिसीएन चोक रहेको प्रहरीले  ट्रक भित्र राखेर निर्दयी ढंगले लैजान लागिएका १८ वटा गोरुसहित ट्रकलाई नियन्त्रणमा लिएको जिल्ला प्रहरी कार्यालय नवलपरासी पश्चिमले जानकारी दिएको छ। प्रहरीका अनुसार १८ गोरुमध्ये एउटा गोरु मृत फेला परेको थियो।

प्रहरीले ट्रक चालक हेटौंडा उपमहानगरपालिका-१८ का २८ वर्षीय तोयनाथ शिवाकोटीलाई नियन्त्रणमा लिएको जनाएको छ। जिल्ला प्रहरी कार्यालय नवलपरासी पश्चिमका अनुसार उद्धार गरिएका सबै गोरुलाई तत्काल सुनवल नगरपालिका-३ किर्तिपुर स्थित रहेको कामधेनु गौशालामा बुझाइएको छ। 

पक्राउ परेका चालकविरुद्ध प्रचलित कानुन अनुसार कारबाही अगाडि बढाइएको नवलपरासी पश्चिम प्रहरीले जानकारी दिएको छ।