नेपाल प्रहरीको एक महिने कारबाहीमा ६१ करोड बढीको राजस्व संकलन

काठमाडौं ।  नेपाल प्रहरीले आर्थिक वर्ष २०८२-०८३ कै पहिलो महिनामा मात्रै ६१ करोड रुपैयाँ बढीको राजस्व संकलन गरेको छ। देशभरमा प्रहरीले गरेको कारबाहीमा साउन महिना ६१ करोड ९ लाख ५४ हजार ७४३ रुपैयाँ  बराबरको राजस्व संकलन गरेको प्रहरी प्रधान कार्यालयले जानकारी दिएको छ।

प्रहरी प्रधान कार्यालयका अनुसार गत  साउन मसान्तसम्म अदालती फैसला कार्यान्वयनतर्फ २४ करोड ३२ लाख ४७ हजार  ६८४  रुपैयाँ  राजस्व संकलन हुँदा ट्राफिक कारबाहीबाट १०  करोड ८८ लाख ५२४ रुपैयाँ बराबर राजस्व संकलन गरेको प्रधान कार्यालयले जनाएको छ।

त्यसैगरी प्रहरीले १४  करोड ४५  लाख ५८ हजार ८७१ रुपैयाँ बराबरको अवैध सुनरचाँदी बरामद गरेको छ। एक महिनाको अवधिमा ९  करोड ७७ लाख  १६४  रुपैयाँको अवैध सामान बरामद गरेको हो। प्रहरी प्रधान कार्यालयका अनुसार प्रहरीले श्रोत नखुलेको ८४ लाख ९२ हजार ४१५ रुपैयाँ बराबद गर्दा अवैध नदीजन्य पदार्थ उत्खननबाट २२  लाख ३२ हजार ३४७ रुपैयाँ राजस्व संकलन गरेको छ।

प्रहरीले  साउनमा २५ लाख १२ हजार ९७३ रुपैयाँको अवैध काठ बरामद गरेको प्रहरी प्रधान कार्यालयले जानकारी दिएको छ। त्यसैगरी ३० लाख ६७ हजार २९५ रुपैयाँको अवैध पशुपंछी, ३२ लाख ६६  हजार ४०० रुपैयाँ बराबरको अवैध मुद्रा बरामद गरेको प्रहरी प्रधान कार्यालयले जनाएको छ।

प्रहरीको कारबाहीमा एक महिनामा  हुण्डी कारोबारको ५० लाख ८१ हजार  रुपैयाँ बरामद गरेको प्रहरी प्रधान कार्यालयले जानकारी दिएको छ।