अपराध नियन्त्रणमा गम्भीर भएर लाग्न प्रहरी कर्मचारीलाई एसपी पौडेलको निर्देशन

बर्दिया । जिल्ला प्रहरी बर्दिया प्रमुख एसपी सरोज पौडेलले जिल्लास्थित विभिन्न प्रहरी कार्यालयहरुको निरीक्षण गरेका छन् ।भर्खरै सरुवा भएर बर्दिया आएका एसपी पौडेलले आज इलाका प्रहरी कार्यालय राजापुर, प्रहरी चौकी मनाउ,भिम्मापुर,पशुपतिनगर र अस्थाई प्रहरी पोष्ट नयाँ बजार ,बालाबजारको निरीक्षण तथा अनुगमन गरेको जिल्ला प्रहरी कार्यालय बर्दियाले जानकारी दिएको छ।

निरीक्षणका क्रममा एसपी पौडेलले समाजमा  शान्तिसुरक्षाको माहोल बनाइराख्न मातहतका प्रहरी कार्यालयका प्रहरी कर्मचारीलाई निर्देशन दिएका छन् । एसपी पौडेलले प्रहरी कर्मचारीका व्यक्तिगत टर्नआउटकोसमेत निरीक्षण गर्दै प्रहरी कार्यालयका ब्यारेक, खाना बनाउने र  खाने मेस , क्यान्टिन तथा हिरासत कक्षको समेत निरीक्षण गरेका हुन् । उनले प्रहरी कार्यालयका विभिन्न शाखाको समेत निरीक्षण गरेका थिए।

एसपी पौडेलले सबैभन्दा पहिला प्रहरी कर्मचारीको चालचलन सहि हुनुपर्ने बताउँदै संगठनले दिएको जिम्मेवारीलाई कर्तव्यनिष्ठ र इमानदारीपूर्वक निभाउन निर्देशन दिएका थिए। गलत कार्य जो सुकै भएपनि कानुनको दायरा ल्याउन पछि नहट्न प्रहरी कर्मचारीलाई उनले निर्देशन दिएका हुन् ।

अपराध नियन्त्रणतर्फ गम्भीर भएर लाग्न बताउँदै एसपी पौडेलले समाजमा भयावह फैलाउने र समाजमा दुर्गन्ध बनाउने लागुऔषध कारोबारीविरुद्ध खरो रुपले उत्रन  निर्देशन समेत दिएका छन् । प्रहरीले सवारी दुर्घटना न्यूनीकरलाई प्राथमिकतामा राखेर जनमानसलाई सचेतना कक्षा दिनुपर्ने एसपी पौडेलले मातहतका प्रहरी कर्मचारीलाई निर्देशन दिएका हुन् ।