शैक्षिक संस्थाहरूमा बम राखेको भनी झुट्टा अफवाह फैलाउने जयरूद्र पक्राउ

काठमाडौं। शैक्षिक संस्थाहरूमा बम राखेको भनी झुट्टा अफवाह फैलाउने कार्यमा संलग्न रहेको आरोपमा प्रहरीले एक जनालाई पक्राउ गरेको छ।

पक्राउ पर्नेमा कीर्तिपुर नगरपालिका-१० बस्ने महोत्तरीको महोत्तरी गाउँपालिका-२ घर भएका ३८ वर्षीय जयरूद्र झा रहेको प्रहरी प्रधान कार्यालयले जानकारी दिएको छ । 

प्रहरी कन्ट्रोल रूमको आकस्मिक १०० नम्बरमा फोन गरी काठमाडौंस्थित विभिन्न शैक्षिक संस्थाहरूमा विष्फोटक पदार्थ राखेको छ भनी झुट्टा अफवाह फैलाई सार्वजनिक शान्तिमा खलल पुर्‍याएको घटनाको अनुसन्धानको क्रममा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले उक्त कार्यम संलग्न उनलाई काठमाडौं महानगरपालिका-१० नयाँबजार कीर्तिपुरबाट पक्राउ गरेको हो । 

झालाई आवश्यक अनुसन्धान तथा कारवाहीको लागि जिल्ला प्रहरी परिसर काठमाडौं पठाइएको प्रहरी प्रधान कार्यालयले जनाएको छ।