प्रहरी कार्यालय अगाडिबाट चोरिएको मोटरसाइकलसहित ४ जना १४४ घण्टामै कोहलपुर प्रहरीको नियन्त्रणमा

कोहलपुर । इलाका प्रहरी कार्यालय कोहलपुरले मोटरसाइकल चोरीमा संलग्न रहेको आरोपमा चार जनालाई पक्राउ गरेको छ।

भदौ १३ गते दिउँसो कोहलपुर नगरपालिका-११ स्थित इलाका प्रहरी कार्यालय अगाडि पार्किङ गरि राखेको भे ११ प ९६७८ नम्बरको मोटरसाइकल चोरी गरेको गिरोहलाई खोजतलास गर्ने क्रममा कोहलपुर नगरपालिका-११ बाट सोमबार भारतका ४२ वर्षीय आजाद  अन्सारी र नेपालगन्जका ४३ वर्षीय संजिब कुमार यादबलाई पक्राउ गरेपछि थप दुई जनालाई पक्राउ गरेको इलाका प्रहरी कार्यालय कोहलपुरले जानकारी दिएको छ।

सोमबार कोहलपुर प्रहरीको नियन्त्रणमा परेका उनीहरुले उक्त मोटरसाइकल नेपालगन्ज महानगरपालिका-८ का ६० वर्षीय सहिद अहमद सिद्दीकीलाई ३ हजार रुपैयाँ बिक्री गरेको प्रारम्भिक अनुसन्धानमा खुलेपछि सिद्दीकीलाई मंगलबार दिउँसो नेपालगन्जबाट पक्राउ गरेको कोहलपुर प्रहरी प्रमुख डीएसपी लक्ष्मी खनालले जानकारी दिएकी छिन् ।

डीएसपी खनालका अनुसार उक्त चोरी भएको मोटरसाइकल नेपालगन्ज- १८ भुजईगाउँमा रहेको समिम अहमदले संचालन गरेको शाहजी मोटरसाइकल ग्यारेज नजिकबाट फेला पारिएको हो। प्रहरीले ३० वर्षीय समिम अहमदलाई पनि नियन्त्रणमा लिएको जनाएको छ।  कोहलपुर प्रहरी याक्सनमा आउँदै  चोरी भएको मोटरसाइकललाई १४४ घन्टामै बरामद गर्न सफल भएको हो।

कोहलपुर प्रहरीले मोटरसाइकल चोरीको आरोपमा पक्राउ परेका उनीहरुविरुद्द थप अनुसन्धान अगाडि बढाएको जनाएको छ।