पुलबाट मोटरसाइकल खोलामा खस्यो, दुई जनाको मृत्यु

काठमाडौं । पुलबाट मोटरसाइकल खोलामा खसेर दुर्घटना हुँदा दुई जनाको मृत्यु भएको छ। 

मकवानपुरको मकवानपुरगढी गाउँपालिका-५ र भीमफेदी गाउँपालिका-१ को सिमामा पर्ने बुङ्दलखोला पुलमा आज बिहान मोटरसाइकल पुलबाट खसेर वीरबहादुर गुरुङ र चन्द्रबहादुर गुरुङको मृत्यु भएको प्रहरीले जानकारी दिएको छ।

जिल्ला प्रहरी कार्यालयका मकवानपुरका अनुसार बाप्र०३–००५प ७९८० नम्बरको मोटरसाइकल बुङ्दलखोलाबाट ५० फिट तल खस्दा मोटसाइकल चालक हेटौँडा उपमहानगरपालिका-२ चौकी टोलका  ३९ वर्षीय वीरबहादुर  र पछाडि सवार पूर्वी नवलपरासी कावासोती नगरपालिका-१३ घर भई हेटौँडा उपमहानगरपालिका-२ बस्ने ३५ वर्षीय चन्द्रबहादुरको मृत्यु भएको हो । 

मृतक दुवै जनाको शव परीक्षणका लागि हेटौँडा अस्पताल ल्याइएको जिल्ला प्रहरी कार्यालयका प्रवक्ता प्रहरी नायब उपरीक्षक पुष्कर बोगटीले जानकारी दिए । घटनाबारे थप अनुसन्धान भइरहेको  मकवानपुर प्रहरीले जनाएको छ ।