एनपीएल 'अनलाइन सट्टाबाजी' मा संलग्न ८ भारतीय नागरिक पक्राउ

काठमाडौं। नेपाल प्रिमियर लिग (एनपीएल) क्रिकेट प्रतियोगितामा अनलाइन सट्टाबाजी गरेको आरोपमा आठ जना भारतीय नागरिकलाई प्रहरीले पक्राउ गरेको छ। काठमाडौं उपत्यका अपराध अनुसन्धान कार्यालय टेकुबाट खटिएको टोलीले महानगरपालिकाको १४ नम्बर वडास्थित बल्खु क्षेत्रबाट उनीहरूलाई पक्राउ गरेको हो।

पक्राउ पर्नेहरूमा आन्द्रप्रदेशका विभिन्न स्थानका ३१ वर्षीय राजा यदुला, ३५ वर्षीय महेश बाबु, ३० वर्षीय पण्डित श्रीनिवासुलु, २० वर्षीय सेख सोयब, ३० वर्षीय नभिन मड्डेला, ३२ वर्षीय महमद रफी सेख, १९ वर्षीय साई कुमार तम्मिसेट्टी र २८ वर्षीय सेख चन्द बसल रहेका छन्। उनीहरू केही समयदेखि काठमाडौं–२६ सामाखुशीमा बस्दै आएका थिए।

प्रहरीका अनुसार नेपाल क्रिकेट संघ (क्यान) द्वारा मंसिर १ देखि २७ गतेसम्म सञ्चालन भइरहेको एनलीएलको दोस्रो संस्करणमा खेलका नतिजामाथि अनलाइन साइट betacular.live मार्फत रकम लगानी गरेर सट्टाबाजी गर्दै आएको सूचनाको आधारमा उनीहरूलाई नियन्त्रणमा लिइएको हो।

अनधिकृत रूपमा सट्टाबाजी गर्ने तथा सहभागी भएको अभियोगमा पक्राउ परेकाहरूलाई आवश्यक अनुसन्धान तथा कारबाहीका लागि जिल्ला प्रहरी परिसर काठमाडौंमा बुझाइएको प्रहरीले जनाएको छ।