जेनजी आन्दोलन घटनामा परिसरमा १५४ मुद्दा दर्ता, २६७ जना पक्राउ

काठमाडौँ। काठमाडौँमा भदौ २३ र २४ गते भएको जेनजी आन्दोलनका घटनाबारे प्रहरीले हालसम्म १०४ उजुरी दर्ता भएको जनाएको छ। आज आयोजित पत्रकार सम्मेलनमार्फत काठमाडौँ प्रहरी परिसरले आन्दोलनका क्रममा पुगेको मानवीय तथा भौतिक क्षतिको विवरण सार्वजनिक गरेको हो।

परिसरका एसपी तथा प्रवक्ता पवनकुमार भट्टराईका अनुसार दर्ता भएका उजुरीमध्ये ६६ वटा सरकारी कार्यालय, २२ व्यक्तिगत तथा १६ संस्थागत र व्यापारिक प्रतिष्ठानसँग सम्बन्धित छन्। दुई दिनको आन्दोलनका क्रममा काठमाडौँ जिल्लामा ४९ जनाको मृत्यु भएको पुष्टि भएको उनले जानकारी दिए। तीमध्ये सात जनाको पहिचान नखुलेपछि डीएनए परीक्षणका लागि सामग्री प्रयोगशालामा पठाइएको छ।

परिसरका अनुसार ७ उजुरी तामेलीमा राखिएको छ भने २ सय २८ स्थानबाट क्षति विवरण संकलन गरिएको छ।

आन्दोलनसँग जोडिएका घटनामा कर्तव्य ज्यान, आपराधिक उपद्रव, चोरी, हातहतियार खरखजना, अभद्र व्यवहार तथा ज्यान मार्ने उद्योगसहित १ सय ५४ मुद्दा दर्ता भएको छ। दर्ता भएका मुद्दामार्फत २ सय ६७ जनालाई पक्राउ गरिएको छ। तीमध्ये ८७ जनालाई हाजिरी जमानीमा छोडेर अनुसन्धान अगाडि बढाइएका छन्। १ सय १३ जना न्यायिक हिरासतमा छन् भने अदालतमा पेस गरिएका मध्ये २३ जना धरौटीमा रिहा र ४३ जना पुर्पक्षका लागि थुनामा रहेका छन्। पक्राउ परेकामध्ये ५ जना मात्र महिला रहेको प्रहरीले जनाएको छ।

एसपी भट्टराईका अनुसार आन्दोलनका क्रममा जेलबाट भागेका ५९ जनालाई फेरि नियन्त्रणमा लिइएको छ। ती थुनुवा ज्यान मार्ने उद्योगदेखि अभद्र व्यवहारसम्बन्धी मुद्दामा सजाय कटाइरहेका थिए। बाँकी १५ जना भागेका थुनुवा पनि प्रहरीको सम्पर्कमा रहेको उनले स्पष्ट पारे।