सडकमै थन्किएको कन्टेनर बन्यो काल, ठोक्किँदा मोटरसाइकल चालकले गुमाए ज्यान

काठमाडौं  । भयानक सवारी दुर्घटनामा परेर एक जनाले ज्यान गुमाएका छन्  भने अर्का एक जना घाइते भएका छन् । सडकमा बिग्रिएर रोकिराखिएको कन्टेनरसँग मोटरसाइकल ठोक्किँदा उक्त दुर्घटना भएको प्रहरीले जानकारी दिएको छ।

पूर्व–पश्चिम राजमार्गअन्तर्गत हेटौंडा उपमहानगरपालिका–१९ बस्तिपुरमा सडकमा रोकिराखिएको कन्टेनरसँग मोटरसाइकल ठोक्किँदा मकवानपुरगढी गाउँपालिका–२ गैरीभञ्याङ निवासी ३० वर्षीय बालकृष्ण अधिकारीको मृत्यु भएको हो भने बेसीशहर नगरपालिका–१० पासाचौरका ४८ वर्षीय भवरजंग गुरुङ  घाइते भएको प्रहरीले जनाएको छ।

प्रहरीका अनुसार चितवनतर्फबाट हेटौंडा आउँदै गरेको ना ५ ख ३५८७ नम्बरको कन्टेनर बिग्रिएर सडक किनारमै रोकिएको अवस्थामा थियो । सोही क्रममा बा ४९ प ६६५८ नम्बरको मोटरसाइकल गएराति करिब ११ बजेर ४० मिनेटतिर कन्टेनरमा ठोक्किँन पुगेको हो ।

दुर्घटनामा गम्भीर घाइते भएका मोटरसाइकल चालक बालकृष्ण अधिकारीलाई उपचारका क्रममा गए राति १२ बजेर १० मिनेटमा चिकित्सकले मृत घोषणा गरेका थिए ।  मोटरसाइकलको पछाडि सवार भवरजंग गुरुङको  टाउको, बायाँ खुट्टा तथा शरीरका विभिन्न भागमा चोट लागेको र हाल मकवानपुरमै उपचार भइरहेको मकवानपुर प्रहरीले जानकारी दिएको छ ।

दुर्घटनाको जानकारी पाउनासाथ इलाका प्रहरी कार्यालय नेवारपानीबाट ट्राफिकसहितको टोली घटनास्थलमा खटिएर उद्धार कार्य गरेको थियो । प्रहरीले कन्टेनर चालक धोबिनी गाउँपालिका–२ का २४ वर्षीय राजवली रामलाई नियन्त्रणमा लिएर थप अनुसन्धानका लागि जिल्ला प्रहरी कार्यालय मकवानपुरमा राखिएको प्रहरीले जनाएको छ ।