प्रहरीको राशन स्केल बढ्ने संकेत

काठमाडौँ । गृह मन्त्रालयले प्रहरीको राशन स्केल बढाउने प्रक्रिया अघि सारेको छ । गृहमन्त्री ओमप्रकाश अर्यालले प्रहरीको राशन स्केल बढाउने निर्णय गर्दै अर्थ मन्त्रालयसँग सहमति मागेका छन् । अर्यालले प्रहरी प्रधान कार्यालयको प्रस्तावमा उक्त निर्णय गरेका छन् ।

प्रहरीतर्फबाट अन्य सुरक्षा निकाय सरह राशन सुविधा कायम गरिनुपर्ने माग आएको गृह मन्त्रालयको भनाइ छ। सो प्रस्तावबारे गृह मन्त्रालयमा छलफलपछि प्रहरीको राशन स्केललाई समयानुकूल बनाउँदै डब्लुएचओले तोकेको न्यूनतम पोषण मापदण्डअनुसार अद्यावधिक गर्नुपर्ने निष्कर्ष निकालिएको छ । उक्त प्रस्तावमा सहमति दिन गृहले अर्थ मन्त्रालयलाई पत्राचार गरिसकेको मन्त्रालयका प्रवक्ता तथा सहसचिव आनन्द काफ्लेले बताएका छन् ।

हाल प्रहरी कर्मचारीले १६ आइटमको राशन सुविधा पाउँदै आएकोमा त्यसलाई बढाएर १९ आइटम पुर्‍याउने प्रस्ताव गरिएको छ । काठमाडौँ उपत्यकामा कार्यरत प्रहरीलाई अहिले दैनिक २०१ रुपैयाँ बराबरको राशन सुविधा उपलब्ध छ, जसबाट खाजा र खानासहित दिनमा चार पटक भोजनको व्यवस्था गर्नुपर्ने हुन्छ । यस दरलाई बढाएर सशस्त्र प्रहरी बल र नेपाली सेनाको हाराहारीमा पुर्‍याउने लक्ष्य राखिएको छ । हाल नेपाली सेनाका सकलदर्जाले २४ आइटम र सशस्त्र प्रहरीले १९ आइटम बराबरको राशन सुविधा पाउँदै आएका छन् ।

प्रहरी प्रधान कार्यालयले जिल्ला दररेटका आधारमा राशन स्केल समायोजन गर्न तीनवटा विकल्पसहित प्रस्ताव अघि सारेको छ । हाल लागू जिल्ला दररेट २०७१ मा तोकिएको हो, जसमा २०७८ मा १५ प्रतिशत वृद्धि गरिएको थियो । कानुनअनुसार प्रमुख जिल्ला अधिकारीको संयोजकत्वमा रहेको दररेट समितिले लागत अनुमान गर्ने व्यवस्था छ, जसमा ढुवानी खर्चका कारण जिल्लाअनुसार दर फरक–फरक हुन्छ ।

गृह मन्त्रालयले पठाएको प्रस्ताव अनुसार प्रहरीलाई १९ आइटम राशन स्केल लागू गर्दा वार्षिक करिब ३ अर्ब ६५ करोड रुपैयाँसम्म अतिरिक्त आर्थिक दायित्व बढ्ने अनुमान गरिएको छ । मन्त्रालयका एक उच्च अधिकारीका अनुसार यही आर्थिक भारका आधारमा तीन विकल्पसहित अर्थ मन्त्रालयमा निर्णयका लागि प्रस्ताव पठाइएको हो ।

हाल प्रहरी कर्मचारीले राशन बापतको रकम नगद रूपमा पाउँदै आएका छन् भने सशस्त्र प्रहरी बलले सेन्टर मेस प्रणाली अपनाउँदै आएको छ । सेन्टर मेसबाट सशस्त्रका जवानलाई हप्तामा चार छाक मासु, अण्डा करी, सलाद र साग उपलब्ध गराइन्छ । काठमाडौँ उपत्यकामा सशस्त्रका जवानले दैनिक करिब २०३ रुपैयाँ बराबरको राशन सुविधा पाउँछन् भने जिल्ला दररेट अनुसार मुगुजस्ता दुर्गम जिल्लामा यो रकम ३०० रुपैयाँभन्दा बढी छ । यद्यपि, बढ्दो महँगीका कारण मुगुमा समेत उक्त रकम अपुग हुने सशस्त्रका अधिकारीहरूको गुनासो छ ।