सुर्खेतको होटलमा बेहोस भेटिएका लोकबहादुरको अस्पतालमा मृत्यु, ३० वर्षीय राकेश नियन्त्रणमा

सुर्खेत ।  भेरीगंगा नगरपालिका–१२ सल्लिचोक का  ३९ वर्षीय लोकबहादुर डाँगीको रहस्यमय मृत्यु भएको छ। उनी बिहीबार बिहान न्यू जाजरकोटी धर्मा शक्ति एन्ड लज होटलको कोठा नम्बर ३ मा अचेत अवस्थामा फेला परेको प्रहरीले जानकारी दिएको छ।

प्रहरीका अनुसार बिहान करिब साढे ५ बजे कोठा निरीक्षण गर्ने क्रममा डाँगी अचेत अवस्थामा भेटिएपछि तत्काल उपचारका लागि छिन्चुस्थित गणेश मेडिकल लगिएको थियो। त्यहाँ प्रारम्भिक उपचारपछि थप उपचार आवश्यक देखिएकाले वडाध्यक्ष रामबहादुर डाँगीसहितको टोलीले बिहान करिब सवा ६ बजे कर्णाली प्रदेश अस्पताल, कालागाउँ पुर्‍याएको थियो। अस्पताल पुगेपछि चिकित्सकले उनलाई मृत घोषणा गरेका थिए।

जिल्ला प्रहरी कार्यालय सुर्खेतका प्रवक्ता डीएसपी कबिन्द्रसिंह बोहराका अनुसार बुधबार राति करिब साढे १० बजे भेरीगंगा–१२ सल्लिचोककै ३० वर्षीय राकेश सुनारले उक्त होटलमा कोठा भाडामा लिएका थिए। प्रारम्भिक अनुसन्धानबाट सुनारले बिहीबार बिहान करिब साढे ४ बजे डाँगीलाई आफ्नो कोठामा बोलाएको खुलेको प्रहरीले जनाएको छ।

घटनापछि प्रहरी निरीक्षक प्रकाश केसीको नेतृत्वमा खटिएको टोलीले सुनारलाई बिहान पौने ८ बजे नियन्त्रणमा लिएर सोधपुछ सुरु गरेको छ। अनुसन्धानका क्रममा सुनार लागुऔषध प्रयोगकर्ता रहेको प्रारम्भिक रूपमा खुलेको प्रहरीले जनाएको छ।

घटनाबारे थप अनुसन्धान भइरहेको जिल्ला प्रहरी कार्यालय सुर्खेतले जनाएको छ।