सप्तरी कारागार तनावग्रस्त, केहि कैदीबन्दीद्वारा आत्मदाह प्रयास, ठुलो संख्या प्रहरी परिचालन

काठमाडौं । कारागारमा चौकीदार नियुक्तिको विषयलाई लिएर विवाद चर्किएपछि कैदीबन्दीहरूले राजविराज कारागारमा आन्दोलन थालेका छन्। सप्तरीको राजबिराजस्थित जिल्ला कारागारका  जेलर रूपक मण्डलमाथि आर्थिक चलखेल गरेको आरोप लगाउँदै उनीहरूले तीन दिनदेखि आन्दोलन जारी राखेका हुन्।

आन्दोलनरत कैदीबन्दीहरूले चौकीदार नियुक्तिका नाममा रकम असुलिएको आरोप लगाउँदै जेलर मण्डलको तत्काल सरुवा, घटनाको निष्पक्ष छानबिन तथा दोषीमाथि कारबाहीको माग गरेका छन्। स्थिति नियन्त्रणमा लिन प्रहरीले कारागारभित्र प्रवेश गर्ने प्रयास गरेपछि तनावग्रस्त  बढेको थियो। त्यसक्रममा केही कैदीबन्दीहरूले शरीरमा मट्टीतेल खन्याएर आत्मदाहको प्रयास गरेपछि प्रहरी पछि हटेको स्रोतको दाबी छ।

कैदी धर्नेन्द्रप्रसाद साहले आफूलाई चौकीदार बनाइदिने आश्वासन दिँदै चौकीदार कामेश्वर यादवले बाहिरका विनोद यादवमार्फत जेलरको नाममा पाँच लाख रुपैयाँ लिएको आरोप लगाएका छन्। उक्त रकम जेठ ५ गते लिइएको उनको भनाइ छ।

यही आर्थिक लेनदेनको विषयमा विवाद बढेपछि चौकीदार यादवलाई झुम्का कारागार सरुवा गर्ने तयारी गरिएको र त्यसपछि ‘बी ब्लक’का कैदीबन्दीमाथि कुटपिट भएको आरोपसमेत लगाइएको छ। घटनापछि कारागार परिसरमा नेपाल प्रहरी र सशस्त्र प्रहरी बलको बाक्लो सुरक्षा व्यवस्था गरिएको छ। सुरक्षा संवेदनशीलताको कारण देखाउँदै सञ्चारकर्मीहरूलाई घटनास्थलमा पुगेर समाचार सङ्कलन गर्न समेत रोक लगाइएको बताइएको छ।

यस विषयमा प्रशासन कार्यालयले कारागारको सुरक्षा अवस्था बिग्रिन सक्ने देखिएपछि प्रहरी परिचालन गरिएको बताइएको छ। प्रहरी भित्र प्रवेश गर्न खोज्दा केही कैदीबन्दीहरूले शरीरमा मट्टीतेल खन्याएका थिए। अहिले सम्बन्धित पक्षसँग छलफल र सम्झाइबुझाइ भइरहेको तथा अवस्था सामान्य बन्दै गएको प्रशासनले जनाएको छ।

प्रशासन कार्यालयका अनुसार  ‘बी ब्लक’का चौकीदार राम रिझनले कैदीबन्दीप्रति समान व्यवहार नगरेको आरोपबाट विवाद सुरु भएको प्रारम्भिक जानकारी प्राप्त भएको छ। घटनाबारे थप अनुसन्धान भइरहेको प्रशासनले जनाएको छ।