बाँके कारागारले भन्यो– ‘कपोलकल्पित र भ्रामक समाचारको पछि नलाग्नुस्’, 'कुनै सत्यता छैन'

नेपालगन्ज । बाँके कारागार कार्यालयले पछिल्लो केही दिनयता विभिन्न सञ्चारमाध्यम तथा सामाजिक सञ्जालमा कारागारसँग सम्बन्धित विषयमा प्रकाशित तथा प्रसारित सामग्रीप्रति गम्भीर ध्यानाकर्षण भएको जनाएको छ।

कारागार कार्यालयले विज्ञप्ति जारी गर्दै केही सञ्चारमाध्यम तथा सामाजिक सञ्जालमा कपोलकल्पित, अतिरञ्जित र भ्रामक सामग्री प्रकाशन तथा प्रसारण भइरहेको जनाएको हो।

कार्यालयका अनुसार उक्त विषयमा कारागार प्रशासन, आन्तरिक प्रशासन तथा कारागार सुरक्षाको संयुक्त टोलीले छानबिन गरेको थियो। छानबिनका क्रममा सञ्चारमाध्यम तथा सामाजिक सञ्जालमा उल्लेख गरिएका विषयमा कुनै सत्यता नपाइएको कार्यालयले जनाएको छ।

कारागार कार्यालयले भ्रामक सामग्रीको पछि नलाग्न तथा कपोलकल्पित समाचार प्रकाशन र प्रसारण नगर्न सम्बन्धित सबैलाई आग्रह गरेको छ। साथै कारागारसँग सम्बन्धित कुनै विषयमा जानकारी आवश्यक परेमा आधिकारिक निकायबाट सत्यतथ्य बुझेर मात्र समाचार तथा सामग्री प्रकाशन–प्रसारण गर्न आग्रह गरेको छ।

कारागार प्रशासनले अपुष्ट तथा भ्रामक सामग्रीले कारागारको वास्तविक अवस्थाबारे गलत धारणा सिर्जना गर्न सक्ने भन्दै तथ्यमा आधारित र जिम्मेवार सञ्चारका लागि सबै पक्षलाई आग्रह गरेको छ।