विपद् प्राधिकरणले भन्यो: भोटेकोशीमा लेदोसहित पानीको बहाव फेरि बढेको छ, उच्च सतर्कता अपनाउनुहोस्

काठमाडौं । रसुवाको भोटेकोशी नदीमा पानीको बहाव पुनः बढ्न थालेपछि राष्ट्रिय विपद् जोखिम न्यूनीकरण तथा व्यवस्थापन प्राधिकरणले नदी आसपासका क्षेत्रमा उच्च सतर्कता अपनाउन आग्रह गरेको छ।

प्राधिकरणका अनुसार १० भदौमा ठूलो बाढी आएको भोटेकोशी क्षेत्रमा शुक्रबार लेदोसहित पानीको बहाव बढेको सूचना प्राप्त भएको छ। नदीमा बहाव बढेसँगै पुनः बाढी आउन सक्ने सम्भावना रहेकाले तल्लो तटीय क्षेत्रमा जोखिम बढेको प्राधिकरणले जनाएको छ।

भोटेकोशी र त्रिशूली नदी किनारमा उद्धार, खोज तथा राहतका काममा खटिएका सुरक्षाकर्मी, स्वयंसेवक तथा अन्य व्यक्तिलाई विशेष सावधानी अपनाउन प्राधिकरणले अनुरोध गरेको छ। यस्तै, विभिन्न कारणले जोखिमयुक्त क्षेत्रमा रहेका सर्वसाधारणलाई समेत नदीको अवस्था हेरेर सुरक्षित रहन आग्रह गरिएको छ।

प्राधिकरणले नदीको बहावमा अस्वाभाविक परिवर्तन देखिएमा जोखिम नलिई तत्काल सुरक्षित स्थानतर्फ जान आग्रह गरेको छ। सम्भावित जोखिमलाई मध्यनजर गर्दै नदी किनार तथा जोखिमयुक्त स्थानमा अनावश्यक रूपमा नबस्नसमेत सूचनामार्फत सचेत गराइएको छ।

प्राधिकरणका प्रवक्ता तथा उपसचिव शान्ति महतले शुक्रबार जारी गरेको सूचनामा भोटेकोशी तथा त्रिशूली नदीको बहावमा हुने परिवर्तनलाई गम्भीरतापूर्वक लिन आग्रह गरिएको छ।

यसअघि आएको विनाशकारी बाढीबाट भोटेकोशी र आसपासका क्षेत्रमा ठूलो जनधनको क्षति भएकाले नदीमा पुनः बहाव बढेको सूचनापछि थप जोखिम हुन नदिन प्राधिकरणले सबैलाई सतर्क रहन आग्रह गरेको हो।