अवैध अन्तर्राष्ट्रिय कल बाइपासमा संलग्न भारतीय नागरिक उपकरणसहित पक्राउ

काठमाडौं । प्रहरीले अवैध रूपमा अन्तर्राष्ट्रिय कल बाइपास (भिओआइपी) सञ्चालनमा संलग्न एक भारतीय नागरिकलाई पक्राउ गरेको छ।

नेपाल प्रहरी केन्द्रीय अनुसन्धान ब्युरो (सीआईबी) र जिल्ला प्रहरी कार्यालय चितवनको संयुक्त टोलीले नेपाल टेलिकम र एनसेल आजियाटा लिमिटेडको प्राविधिक समन्वयमा भारतीय नागरिक २५ वर्षीय काथराम निथिनलाई विभिन्न उपकरण तथा सामग्रीसहित नियन्त्रणमा लिएको हो।

प्रहरीका अनुसार भरतपुर महानगरपालिका–२ आँपटारीस्थित निर्मला विष्टको घरमा छापा मार्ने क्रममा निथिनलाई पक्राउ गरिएको हो। प्रारम्भिक अनुसन्धानका क्रममा बरामद उपकरण तथा सामग्रीहरू अवैध रूपमा अन्तर्राष्ट्रिय कल बाइपास सञ्चालनमा प्रयोग भइरहेको खुलेको प्रहरीले जनाएको छ।

प्रहरीले उनको साथबाट मोबाइल २६ थान, ल्यापटप २ थान, एनसेलका सिमकार्ड ७७ थान, नेपाल टेलिकमका सिमकार्ड १८ थान, केन्द्रीय प्रशोधन एकाइ ४ थान, विद्युत् आपूर्तिका लागि प्रयोग हुने उल्टो प्रवाह यन्त्र १ थान, ब्याट्री २ थान, २० पोर्ट भएका युएसबी उपकरण ६ थान, युएसबी सेलुलर मोडेम ३३ थान, युएसबी ओटिजी टु अडियो केबल ३० थान, पाँच पोर्टको सञ्जाल स्विच १ थान, इन्टरनेट राउटर २ थान तथा विभिन्न प्रकारका तथ्याङ्क केबल बरामद गरेको जनाएको छ।

निथिनमाथि दूरसञ्चार ऐन, २०५३ को दफा ४७ को उपदफा (५) बमोजिमको कसुरमा जिल्ला प्रहरी कार्यालय चितवनबाट थप अनुसन्धान भइरहेको प्रहरीले जनाएको छ।