जिउँदै कुकुरलाई पुलबाट नदीमा फालेको आरोपमा महिला पक्राउ

धनगढी । बझाङमा कुकुरलाई जिउँदै सेती नदीमा फालेको आरोपमा प्रहरीले एक महिलालाई पक्राउ गरेको छ।

पक्राउ पर्नेमा जयपृथ्वी नगरपालिका–३, पडेसकी ४२ वर्षीया बिमला देवी रोकाया रहेकी छन्। उनलाई जयपृथ्वी नगरपालिका–१० चैनपुरस्थित पानकोट पुलबाट कुकुरलाई नदीमा फालेको आरोपमा पक्राउ गरिएको प्रहरीले जनाएको छ।

जिल्ला प्रहरी कार्यालय बझाङका अनुसार रोकायालाई नियन्त्रणमा लिएर हिरासतमा राखिएको छ। घटनाबारे थप अनुसन्धान भइरहेको छ।

प्रहरीका अनुसार रोकायाले घरनजिकैको बाटोमा आवतजावत गर्ने मानिसलाई कुकुरले टोक्न थालेपछि पानकोट पुलबाट सेती नदीमा फालेकी हुन्।

उक्त कुकुर करिब दुई सातादेखि बिरामी रहेको खुलेको छ। प्रहरीका अनुसार कुकुरको शरीरको पछाडिको भाग पाकेको र दुर्गन्ध आउने गरेको थियो घटनाबारे प्रहरीले थप अनुसन्धान अगाडि बढाएको जनाएको छ।